സംസ്ഥാനത്ത് വീണ്ടും നിപ; കോഴിക്കോട്ട് ചികിത്സയിലുള്ളത് 12കാരൻ

കോഴിക്കോട്​: ജില്ലയിൽ വീണ്ടും നിപ വൈറസ്​ റിപ്പോർട്ട്​ ചെയ്​തതായി സൂചന. കോഴിക്കോ​ട്ടെ ആശുപത്രിയിൽ ചികിത്സയിലുള്ള 12 വയസ്സുകാരനാണ്​ രോഗലക്ഷണങ്ങളുള്ളത്​. മസ്​തിഷ്​ക ജ്വരത്തെയും ഛർദിയെയും തുടർന്ന്​​ ആശുപത്രിയിൽ പ്രവേശിപ്പിച്ച കുട്ടിയുടെ സാമ്പിൾ പുനെയിലേക്ക്​ വിദഗ്​ധ പരിശോധനക്കയച്ചപ്പോഴാണ്​ രോഗബാധ പുറത്തുവന്നതെന്നാണ്​ വിവരം​. എന്നാൽ, ഇതുസംബന്ധിച്ച്​ ആരോഗ്യ വകുപ്പി​ന്‍റെയോ ജില്ല ഭരണകൂടത്തിന്‍റെയോ വിശദീകരണം പുറത്തുവന്നിട്ടില്ല. അതേസമയം, ആരോഗ്യ മന്ത്രി വീണ ജോർജ്​ ഞായറാഴ്​ച കോഴിക്കോ​ട്ടെത്തുമെന്നാണ്​ വിവരം.

2018 മേയിലാണ് സംസ്​ഥാനത്ത്​ ആദ്യമായി നിപ റിപ്പോർട്ട്​ ചെയ്​തത്​. വൈറസ് ബാധയെത്തുടർന്ന്​ 17 പേരാണ് മരിച്ചത്. കോഴിക്കോ​ട്​ ചങ്ങരോത്തായിരുന്നു പകർച്ചവ്യാധിയുടെ ഉറവിടം. പഴംതീനി വവ്വാലുകളിൽനിന്നാണ് രോഗം മനുഷ്യരിലേക്ക് പടർന്നതെന്നാണ്​ പിന്നീട്​ കണ്ടെത്തിയത്​.

Also Read:നിപ വൈറസ്​ ബാധയുടെ ഉറവിടം പഴംതീനി വവ്വാലെന്ന്​ സ്​ഥിരീകരണം

2019 ജൂണിൽ കൊച്ചിയിൽ വീണ്ടും നിപ സ്ഥിരീകരിച്ചിരുന്നു. 23 കാരനായ വിദ്യാർഥിക്കാണ് അന്ന് രോഗം സ്ഥിരീകരിച്ചത്.