വിദ്യാർഥിനികൾക്ക് പീഡനം; യൂത്ത് ലീഗ് നേതാവിനെ അറസ്​റ്റ്​ ​ ചെയ്യാതെ പൊലീസ്​

മലപ്പുറം: വിദ്യാർഥിനികളെ ലൈംഗികമായി ഉപദ്രവിച്ചതിന്​ പോക്​സോ ചുമത്തപ്പെട്ട മലപ്പുറത്തെ രണ്ട്​ അധ്യാപകർ ഒളിവിൽതന്നെ. പൊലീസ്​ അറസ്​റ്റ്​ വൈകിപ്പിക്കുന്നതായി ആക്ഷേപമുയർന്നു. ചെമ്മങ്കടവ്​ ഹയർ സെക്കൻഡറി സ്​കൂളിലെ എൻ.കെ. ഹഫ്​സൽറഹ്​മാനും മലപ്പുറം ജി.ജി.എച്ച്​.എസ്.എസിലെ കെ. രാമചന്ദ്രനുമെതിരെയാണ്​ പോക്​സോ പ്രകാരം കേസെടുത്തത്​. പരാതി ലഭിച്ച സമയങ്ങളിൽ ഇവർ നാട്ടിലുണ്ടായിരുന്നിട്ടും അറസ്​റ്റ് ​താമസിപ്പിക്കുകയായിരുന്നു. പ്രതികൾ ഒളിവിലാണെന്നാണ്​ പൊലീസ്​ ഭാഷ്യം.

ഹഫ്​സൽ റഹ്​മാനെതിരെ രണ്ടാഴ്​ച മുമ്പാണ്​ പരാതി ഉയർന്നത്​. സ്വന്തം സ്​കൂളിലെ കുട്ടികളടക്കം ഇയാൾക്കെതിരെ മൊഴി നൽകിയിരുന്നു. ഇതിൽ പ​ലരുടേയും വീടുകളിലെത്തി മൊഴി മാറ്റാൻ ചില കേ​ന്ദ്രങ്ങൾ ശ്രമിച്ചിരുന്നു. കുട്ടികളുടെ പേരുകൾ സമൂഹ മാധ്യമങ്ങൾ വഴി പ്രചരിപ്പിക്കാനും ശ്രമം നടന്നു. ഇത്​ തടയാൻ പൊലീസ്​ കാര്യക്ഷമമായി ഇടപെട്ടില്ലെന്ന്​ പരാതിയുണ്ട്​.

പ്രത്യേക അന്വേഷണസംഘം രൂപവത്​കരിച്ച്​ തിരച്ചിൽ ഉൗർജിതമാക്കിയതായി പൊലീസ്​ അവകാശപ്പെടുന്നു. പ്രതികൾ വിദേശത്തേക്ക്​ കടക്കാതിരിക്കാൻ ലുക്ക്​ഒൗട്ട്​ നോട്ടീസ്​ പുറപ്പെടുവിക്കുമെന്നും പൊലീസ്​ പറയുന്നു. കഴിഞ്ഞയാഴ്​ചയാണ്​ മലപ്പുറം ഗേൾസിലെ അധ്യാപകനെതിരെ പരാതി ഉയർന്നത്​. സ്​കൂൾ കൗൺസിലറോടാണ്​ വിദ്യാർഥിനി പരാതി പറഞ്ഞത്​. അവർ പൊലീസിന്​ വിവരം നൽകി. പോക്​സോ ​പ്രകാരം അന്നുതന്നെ കേസ്​ രജിസ്​റ്റർ ചെയ്​തെങ്കിലും പ്രതി ഒളിവിലാണെന്നാണ്​ പൊലീസ്​ പറയുന്നത്​. ഹഫ്​സൽ റഹ്​മാൻ യൂത്ത്​ ലീഗ്​ ജില്ല വൈസ്​ പ്രസിഡൻറാണ്​. രാമചന്ദ്രന്​ ഇടത്​ അധ്യാപക സംഘടനയുമായി ബന്ധമുണ്ട്​. പ്രതികൾക്ക്​ രാഷ്​ട്രീയ സംരക്ഷണം ലഭിക്കുന്നെന്ന പരാതി ശക്തമാണ്​.

ഹഫ്സലിനെതിരായ പരാതി രാഷ്​ട്രീയപ്രേരിതം -യൂത്ത് ലീഗ്
മലപ്പുറം: ചെമ്മങ്കടവ് ഹയർ സെക്കൻഡറി സ്കൂൾ അധ്യാപകനായ എൻ.കെ. ഹഫ്സൽ റഹ്​മാനെതിരെ ഉയർന്നുവന്ന ലൈംഗിക പീഡന പരാതി രാഷ്​ട്രീയ പ്രേരിതമാണെന്ന് യൂത്ത് ലീഗ് ജില്ല ജന. സെക്രട്ടറി കെ.ടി. അഷ്റഫ്​. ഹഫ്സൽ യൂത്ത് ലീഗി​​​​െൻറ ജില്ല വൈസ് പ്രസിഡൻറായതിനാൽ സംഘടന നിയോഗിച്ച കമീഷൻ ഇത്​ അന്വേഷിച്ചു. ട്രഷറർ വി.ടി. സുബൈർ തങ്ങൾ ചെയർമാനായ അഞ്ചംഗ കമീഷനാണ് ആരോപണത്തെക്കുറിച്ച് അന്വേഷിച്ചത്. ഹഫ്​സൽ നിരപരാധിയാണെന്നാണ് മനസ്സിലായത്​. പരാതി നൽകിയ കുട്ടികളുടെ പശ്ചാത്തലം ഇതിന് പിന്നിൽ രാഷ്​ട്രീയമുണ്ടെന്ന സൂചന നൽകി. പലരും മൊഴി മാറ്റുകയും ചെയ്​തതായി കെ.ടി. അഷ്റഫ് ചൂണ്ടിക്കാട്ടി.

പോക്​സോ കേസ്​: മലപ്പുറം ജില്ല ഒന്നാമത്​
മലപ്പുറം: ഇൗ വർഷം ഒക്​ടോബർ വരെ ജില്ലയിൽ പോക്സോ (ബാലലൈംഗികാതി​ക്രമം തടയൽ) ആക്​ട് പ്രകാരം രജിസ്​റ്റർ ചെയ്യപ്പെട്ടത്​ 312 കേസുകൾ. സംസ്ഥാനത്ത്​ ഏറ്റവും കൂടുതൽ കേസുകൾ രജിസ്​റ്റർ ചെയ്യപ്പെട്ടത്​ ജില്ലയിൽ. തിരുവനന്തപുരം റൂറലാണ്​ രണ്ടാമത്​-234. മൂന്നാം സ്ഥാനത്ത്​ പാലക്കാട്​-173. നവംബറിലെ കേസുകളുടെ വിവരം ഒ​ൗദ്യോഗികമായി പുറത്തുവിടുന്നതേയുള്ളൂ. മഞ്ചേരി സബ്​ ജയിലിൽ തടവിൽ കഴിയുന്നവരിൽ ഭൂരിപക്ഷവും പോക്​സോ കേസ്​ പ്രതികളാണ്.