മാധ്യമപ്രവർത്തകർക്ക്​ കോടതിയിൽ വിലക്കില്ല– ഹൈകോടതി

കൊച്ചി: ഹൈകോടതിയിൽ മാധ്യമപ്രവർത്തകർക്ക്​ വിലക്കില്ലെന്ന്​ ഹൈകോടതി സുപ്രീംകോടതിയെ അറിയിച്ചു. മാധ്യമപ്രവർത്തകർക്ക്​ കോടതിയിൽ വരുന്നതിന്​ തടസങ്ങളില്ല. എന്നാൽ സംഘർഷത്തെ തുടർന്ന്​ പൂട്ടിയ മീഡിയാ റൂം തുറക്കുന്നതിൽ  എതിർപ്പുകൾ നിലനിൽക്കുന്നുണ്ടെന്നും ഹൈക്കോടതി രജിസ്ട്രാര്‍ക്കുവേണ്ടി ഹാജരായ അഭിഭാഷകന്‍ വി ഗിരി അറിയിച്ചു. കോടതികളിലെ മാധ്യമ വിലക്കിനെതിരെ കേരള പത്രപ്രവര്‍ത്തക യൂണിയന്‍ (കെ.യു.ഡബ്ല്യൂ.ജെ) സമര്‍പ്പിച്ച ഹര്‍ജിയിലാണ് ഹൈക്കോടതി നിലപാട്​ വ്യക്തമാക്കിയത്​.

അഭിഭാഷകരും മാധ്യമപ്രവർത്തകരും തമ്മിൽ നിലനിൽക്കുന്ന അസ്വാരസ്യങ്ങൾ പരിഹരിക്കാൻ ഉൗർജിത ശ്രമം നടന്നുവരികയാണ്​.  പ്രശ്​ന പരിഹാരത്തിന്​ നാലാഴ്ചയെങ്കിലും സമയം വേണമെന്നാണ് ഹൈക്കോടതി രജിസ്ട്രാര്‍ സുപ്രീംകോടതിയിൽ ആവശ്യപ്പെട്ടിരിക്കുന്നത്. .

 കെ.യു.ഡബ്ല്യൂ.ജെയുടെ ഹരജി നവംബർ 7 ന്​ വീണ്ടും പരിഗണിക്കും. ഏഴിന് പ്രശ്‌നപരിഹാര ശ്രമങ്ങള്‍ സംബന്ധിച്ച കൂടുതല്‍ പുരോഗതി അറിയിക്കാന്‍ ശ്രമിക്കുമെന്നാണ് കരുതുന്നതെന്ന് അഡ്വ. വി ഗിരി സുപ്രീം കോടതിയെ അറിയിച്ചു. ജസ്റ്റിസുമാരായ പിനാകി ചന്ദ്രഘോഷ്, യു.യു.ലളിത് എന്നിവരടങ്ങിയ ബെഞ്ചാണ് ഹര്‍ജിയില്‍ വാദം കേട്ടത്.