മലബാർ സിമൻറ്​സ്​ ക്രമക്കേട്​: സി.ബി.​െഎ അന്വേഷണ ഹരജികൾ ഹൈകോടതി തള്ളി

കൊച്ചി: മലബാർ സിമൻറ്​സ്​ ക്രമക്കേടുകളുമായി ബന്ധപ്പെട്ട വിജിലൻസ് കേസുകളിൽ സി.ബി.ഐ അന്വേഷണം ആവശ്യപ്പെടുന്ന ഹരജികൾ ഹൈകോടതി തള്ളി. മലബാർ സിമൻറ്​സ്​ കമ്പനി സെക്രട്ടറിയായിരുന്ന ശശീന്ദ്ര​​​െൻറയും രണ്ട്​ മക്കളുടെയും ദുരൂഹമരണത്തിൽ നടക്കുന്ന സി.ബി.​െഎ അന്വേഷണം ക്രമക്കേട്​ സംബന്ധിച്ച്​ വിജിലൻസ്​ അന്വേഷിക്കുന്ന അഞ്ച്​ കേസിലും കൂടി ബാധകമാക്കണമെന്നാവശ്യപ്പെട്ട്​ ഒാൾ കേരള ആൻറികറപ്​ഷൻ ആൻഡ്​​ ഹ്യൂമൻറൈറ്റ്​സ് പ്രൊട്ടക്​ഷൻ കൗൺസിൽ, സമാന ആവശ്യമുന്നയിച്ച്​ ശശീന്ദ്ര​​​െൻറ പിതാവ്​ വേലായുധൻ മാസ്​റ്റർ, ജനകീയ ആക്​ഷൻ കൗൺസിൽ വൈസ്​ ചെയർമാൻ ജോയ്​ കൈതാരം എന്നിവർ നൽകിയ ഹരജികളാണ്​ ഡിവിഷൻ ബെഞ്ച്​ തള്ളിയത്​. 

മലബാർ സിമൻറ്​സ്​ അഴിമതിക്കേസുകളിൽ സി.ബി.ഐ അന്വേഷണം ആവശ്യപ്പെട്ട് എ.കെ. സുരേന്ദ്രൻ നൽകിയ ഹരജി 2011 നവംബർ 11ന് ഹൈകോടതി തള്ളിയിരുന്നു. പിന്നീട്​ പുനഃപരിശോധന ഹരജിയും തള്ളി. ഇൗ സാഹചര്യത്തിൽ വീണ്ടും അത്തരം ഹരജി പരിഗണിക്കേണ്ടതില്ലെന്ന് കോടതി ചൂണ്ടിക്കാട്ടി. നേരത്തേ സിംഗിൾ ബെഞ്ച്​ പരിഗണിച്ചിരുന്ന ഹരജി പൊതുതാൽപര്യസ്വഭാവം കണക്കിലെടുത്താണ്​ ആക്​ടിങ്​ ചീഫ്​ ജസ്​റ്റിസ്​ അടങ്ങുന്ന ബെഞ്ചിന്​ വിട്ടത്​. സിംഗിൾബെഞ്ച്​ പരിഗണനയിലിരിക്കെ ഹരജിയുമായി ബന്ധപ്പെട്ട ചില ഫയലുകൾ കാണാതായത്​ വിവാദമായിരുന്നു. 

മലബാർ സിമൻറ്​സിലേക്ക് ചുണ്ണാമ്പുകല്ലും ഫ്ലൈ ആഷും വാങ്ങിയതിലും ഇവ എത്തിച്ചതിലുമുള്ള ക്രമക്കേടുകളാണ് വിജിലൻസ് അന്വേഷിച്ച് റിപ്പോർട്ട് നൽകിയത്. ഇവയിൽ സി.ബി.ഐ തുടരന്വേഷണം ആയിരുന്നു ഹരജിക്കാരുടെ ആവശ്യം. അതേസമയം, മലബാർ സിമൻറ്​സിലെ ചില ഡയറക്​ടർമാർക്കെതിരായ പ്രോസിക്യൂഷൻ നടപടി പിൻവലിക്കാനുള്ള സർക്കാർ ഉത്തരവ്​ റദ്ദാക്കണമെന്ന ഒാൾ കേരള ആൻറികറപ്ഷൻ ആൻഡ് ഹ്യൂമൻറൈറ്റ്സ് പ്രൊട്ടക്​ഷൻ കൗൺസിലി​​​െൻറ ഹരജി ഇൗ മാസം 30ന്​ പരിഗണിക്കാൻ മാറ്റി.

മലബാർ സിമൻറ്​സ്​ മുൻ ചെയർമാൻ ജോണി മാത്യു, മുൻ ഡയറക്ടർമാരായ എൻ. കൃഷ്‌ണകുമാർ, പത്മനാഭൻ നായർ എന്നിവർക്കെതിരായ വിജിലൻസ് കേസ്​ അവസാനിപ്പിക്കാനാണ്​ 2012 ​െഫബ്രുവരിയിൽ  സർക്കാർ ഉത്തരവുണ്ടായത്​.