‘കോളനി’ മാറിയെങ്കിലും ‘ഉന്നതി’യില്ല

കാസർകോട്: എസ്.സി, എസ്.ടി വിഭാഗങ്ങളുടെ അധിവാസമേഖലയെ ‘കോളനി’മുക്തമാക്കി സർക്കാർ ഉത്തരവിറക്കിയെങ്കിലും ഈ വിഭാഗത്തിൽപെട്ട രണ്ടരലക്ഷത്തോളം വിദ്യാർഥികൾക്ക് രണ്ടുവർഷമായി ഗ്രാന്റില്ല. ഹോസ്റ്റൽ ഫീസുപോലുള്ള മറ്റുചെലവുകൾ രണ്ടരവർഷമായി കിട്ടാറില്ല. ഭൂപ്രശ്​ങ്ങൾ ഉൾപ്പെടെയുള്ള കാര്യങ്ങൾക്ക്​ സർക്കാർ ചെവികൊടുക്കുന്നുമില്ല. സഹായമില്ലാത്തതിന്റെ പേരിൽ മാത്രം പഠനമുപേക്ഷിക്കുന്ന കുട്ടികൾ ഏറെയുണ്ട്​. ആദിവാസി സംഘടനകൾ മുന്നിട്ടിറങ്ങി കുട്ടികളെ സഹായിക്കാൻ രംഗത്തിറങ്ങുന്നെങ്കിലും എങ്ങുമെത്തുന്നില്ല. ‘കോളനി’ഇല്ലാതാക്കി ‘ഉന്നതി’യുൾപ്പെടെയുള്ള പേരുകൾ നൽകിയതുകൊണ്ട്​ മാത്രം ആദിവാസി പ്രശ്​നങ്ങൾക്ക്​ പരിഹാരമാകില്ലെന്ന വിമർശനം ശക്തമാണ്​.

കേന്ദ്ര വിഹിതവും സംസ്ഥാന വിഹിതവുമായാണ്​ കുട്ടികൾക്ക്​ ഗ്രാന്റ്​ ലഭിക്കുന്നത്​. 2022 -23, 2023 -24 വർഷത്തെ ഗ്രാന്റാണ്​ കുട്ടികൾക്ക്​ ലഭിക്കാനുള്ളത്. 2020 -21ലാണ് തുക അവസാനമായി ലഭിച്ചത്.

മാസംതോറും ലഭിക്കുന്ന ഗവേഷണ അലവൻസ്​ ഏഴുമാസമായി ലഭിക്കുന്നില്ല. അതിനുപുറമെ, നിലനിൽക്കുന്ന ഭൂമിപ്രശ്​നവുമുണ്ട്​.

ഷോളയൂരിലെ 186 ആദിവാസി കുടുംബങ്ങൾക്ക്​ നൽകിയ ഭൂമി ഇപ്പോഴും മാഫിയയുടെ കൈവശമാണ്​. പലതവണ റവന്യൂവകുപ്പിന്​ കത്തുനൽകിയെങ്കിലും നടപടിയുണ്ടായില്ല. ആറളത്തെ 2600 കുടുംബങ്ങളുടെ പട്ടയം റദ്ദാക്കിയ സർക്കാർ പുതിയവ നൽകുന്നതിന്​ നടപടിയെടുത്തില്ല. ‘ഫീസ്​ അടക്കാൻ പണമില്ലാത്തതിനാൽ എൻ.ഐ.ടിയിൽ പഠിക്കുന്ന മകന്റെയും കോട്ടയത്ത്​ മെഡിക്കൽ കോളജിൽ പഠിക്കുന്ന മകളുടെയും ഫീസ്​ അടക്കാൻ വലിയ ബുദ്ധിമുട്ടാണെന്ന്​ ബദിയടുക്ക ഗോൽകട്ടയിലെ എസ്​.സി പ്രമോട്ടർ ശാരദ പ്രതികരിച്ചു.

കുട്ടികളെ മാനേജ്മെന്റുകൾ ഹോസ്റ്റലിൽ നിന്ന്​ പുറത്താക്കിക്കൊണ്ടിരിക്കുകയാണ്​. ഇങ്ങനെ പുറത്താക്കപ്പെട്ട കുട്ടികൾക്ക്​​ അഭയം ഒരുക്കികൊടുക്കേണ്ടിവന്നിട്ടുണ്ടെന്ന്​ ഗോത്രമഹാസഭ സംസ്ഥാന കോഓഡിനേറ്റർ ഗീതാനന്ദൻ പറഞ്ഞു.