മുൻകൂട്ടി നോട്ടീസ് നൽകാതെയുള്ള ഹർത്താലുകളോട്​ സഹകരിക്കില്ലെന്ന്​ വ്യാപാരികൾ

കോഴിക്കോട്​: മുൻകൂട്ടി നോട്ടീസ് നൽകാതെ നടത്തുന്ന ഹർത്താലുകളോട്​ സഹകരിക്കില്ലെന്ന്​ വ്യാപാരി വ്യവസായി ഏകോപന സമിതി സംസ്ഥാന പ്രസിഡൻറ്​ ടി. നസിറുദ്ദീൻ. തുടരെയുള്ള ഹർത്താലുകൾ വ്യാപാരികളെ പ്രതിസന്ധിയിലാക്കിയിരിക്കുകയാണ്​. ഹർത്താൽ നടത്തി പ്രതിഷേധിക്കുന്നത്​ രണ്ടു ദിവസം കഴിഞ്ഞി​ട്ടായാലും പോരെയെന്നും അദ്ദേഹം ചോദിച്ചു. കോഴിക്കോട്ട് ചേർന്ന സംസ്ഥാന സെക്ര​േട്ടറിയറ്റിനുശേഷം വാർത്ത സമ്മേളനത്തിൽ സംസാരിക്കുകയായിരുന്നു അദ്ദേഹം. 

ഹർത്താൽ ദിനത്തിൽ കടകൾ തുറന്ന് പ്രവർത്തിക്കാൻ സാഹചര്യമൊരുക്കണമെന്നാവശ്യപ്പെട്ട് രാഷ്​ട്രീയകക്ഷി പ്രതിനിധികളെ കണ്ട് ചർച്ച നടത്തും. കടകൾ പ്രവർത്തിക്കേണ്ടത് സംബന്ധിച്ച നിലപാട് രൂപവത്​കരിക്കാൻ പതിനാല് ജില്ലകളിലും കൗൺസിൽയോഗങ്ങൾ വിളിച്ചുചേർക്കും. കച്ചവടക്കാരു​െട മേലുള്ള കുതിരകയറ്റം ഇനിയെങ്കിലും അവസാനിപ്പിക്കണം.

കഴിഞ്ഞ ദിവസങ്ങളിലുണ്ടായ തുടർച്ചയായ ഹർത്താലുകൾ ജനജീവിതത്തെയും വ്യാപാരികളെയും വലിയ രീതിയിലാണ്​ ബാധിച്ചത്​. കടകൾ മാത്രം അടപ്പിച്ച്​ സ്വകാര്യ വാഹനങ്ങളും ഒാഫിസുകളും പ്രവർത്തിപ്പിക്കാൻ അനുമതി നൽകുന്ന കാഴ്​ചയാണ്​ കണ്ടത്​. മാധ്യമങ്ങളെ ഹർത്താലിൽ നിന്നൊഴിവാക്കി വാർത്തകൾ വരുത്തിച്ച്​ ഹർത്താൽ വിജയിച്ചുവെന്ന്​ ജനങ്ങളെ കാണിക്കാനാണ്​ പാർട്ടികൾ ശ്രമിക്കുന്നത്​. കടകൾ മുഴവൻ അടഞ്ഞുകിടന്നാൽ ഹർത്താൽ പൂർണമായെന്ന്​ വരുത്തി തീർക്കുകയാണ്​​. നിയമപരമായ പോരാട്ടത്തിലൂടെ ഇതിനെ പ്രതിരോധിക്കാൻ ശ്രമിക്കുമെന്നും അദ്ദേഹം കൂട്ടിച്ചേർത്തു. വാർത്ത സമ്മേളനത്തിൽ ദേവസ്യ മേച്ചേരി, മാരിയിൽ കൃഷ്ണൻ നായർ, അഹമ്മദ് ഷെരീഫ്, കുഞ്ഞാവു ഹാജി, എം. വസന്തകുമാർ, രാജു അപ്‌സര, കെ. സേതുമാധവൻ, കെ.കെ. വാസുദേവൻ തുടങ്ങിയവർ പങ്കെടുത്തു.