എൻ.എസ്​.എസ്​ ലക്ഷ്യം മതേതരത്വവും ജനാധിപത്യവും സാമൂഹിക നീതിയും -ജി. സുകുമാരൻ നായർ

പെരുന്ന (ചങ്ങനാശ്ശേരി): മതേതരത്വം, ജനാധിപത്യം, സാമൂഹിക നീതി എന്ന പ്രഖ്യാപിത നയത്തിൽനിന്ന് എൻ.എസ്​.എസ്​ പിന്നോട്ടില്ലെന്ന് പൗരത്വ ഭേദഗതി നിയമം വിഷയത്തിലെ നിലപാട്​ വ്യക്തമാക്കി ജനറൽ സെക്രട്ടറി ജി. സുകുമാരൻ നായർ. 143ാമത് മന്നം ജയന്തി ആഘോഷങ്ങളുടെ ഭാഗമായ അഖില കേരള നായര്‍ പ്രതിനിധി സമ്മേളനത്തിൽ സംസാരിക്കുകയായിരുന്നു അദ്ദേഹം.

ഭരണഘടന ഉണ്ടാകുന്നതിന്​ മു​േമ്പ മതേതരത്വവും ജനാധിപത്യവും സാമൂഹിക നീതിയും മുറുകെപ്പിടിക്കാൻ മന്നത്ത്​ പത്മനാഭൻ പഠിപ്പിച്ചിട്ടുണ്ട്. ഇവ മൂന്നും സംരക്ഷിക്കുകയെന്നതാണ് എൻ.എസ്.എസ്​ നിലപാട്. പൗരത്വ നിയമഭേദഗതി വിഷയത്തിലും ഇതു തന്നെയാണ് നിലപാട്​. സകല സമുദായങ്ങളും പരസ്പരം സഹകരിക്കുന്ന കേരളമാണ് മന്നത്തി​​െൻറ സ്വപ്നം. അതുതന്നെയാണ് ഓരോ നായരുടെയും സ്വപ്നം.

ശബരിമല വിഷയത്തിൽ കേന്ദ്ര-സംസ്ഥാന സർക്കാറുകൾക്കെതിരായ നിലപാട്​ അദ്ദേഹം ആവർത്തിച്ചു. ഈ വിഷയത്തില്‍ കേന്ദ്രസര്‍ക്കാര്‍ എന്‍.എസ്.എസിനോട് നീതി പുലര്‍ത്തിയില്ല. സംസ്ഥാന സര്‍ക്കാർ എൻ.എസ്​.എസിനെ ദ്രോഹിക്കുകയും ചെയ്​തു. മുന്നാക്കക്കാർക്ക് സാമ്പത്തിക സംവരണം നടപ്പാക്കാനുള്ള സംസ്​ഥാന സർക്കാർ തീരുമാനത്തെ സ്വാഗതം ചെയ്​ത സുകുമാരൻ നായർ ദേവസ്വം നിയമനങ്ങളിൽ സാമ്പത്തിക സംവരണം നടപ്പാക്കാത്തതിലുള്ള പ്രതിഷേധവും വ്യക്​തമാക്കി.

മുന്നാക്കക്കാരുടെ സാമ്പത്തിക സംവരണ വിഷയത്തിൽ സർക്കാറി​​െൻറ ഔദാര്യത്തിലായാലും നമ്മുടെ സമ്മർദത്തിലായാലും കാര്യം നടന്നു. എൻ.എസ്.എസ് ആവശ്യപ്പെട്ട മാനദണ്ഡങ്ങൾ അംഗീകരിച്ച് സാമ്പത്തിക സംവരണം നടപ്പാക്കുന്നതിൽ സന്തോഷമുണ്ട്. കേന്ദ്ര സർക്കാർ ഏർപ്പെടുത്തിയ സംവരണത്തിൽ ഒരു നിലപാടും ദേവസ്വം നിയമനങ്ങളിലേക്കുള്ള സംവരണത്തിൽ മറ്റൊരു നിലപാടും സ്വീകരിക്കുന്നത് ഇരട്ടത്താപ്പാണ്. ഈ വിഷയത്തിലെ കുരുക്ക് അഴിക്കാൻ എല്ലാ നടപടിയും സ്വീകരിക്കും.

ഒരിക്കൽ സംവരണം ലഭിച്ച വിഭാഗങ്ങൾക്ക് കേരള അഡ്മിനിസ്ട്രേറ്റിവ് സർവിസിൽ വീണ്ടും നൽകാനുള്ള നീക്കത്തിനെതിരെ ഏതറ്റംവരെയും പോകും. സാമൂഹിക നീതിയാണ്​ എൻ.എസ്​.എസ്​ ലക്ഷ്യം. എല്ലാവരോടും സമദൂരമാണെങ്കിലും അതിലെ ശരിദൂരം എങ്ങനെ പ്രയോഗിക്കുമെന്നതാണ് വിഷയം. നമ്മുടെ വിശ്വാസങ്ങൾക്ക് എതിരായി നിൽക്കുന്നവർക്കെതിരെയാണ് പാർലമ​െൻറ്​ തെരഞ്ഞെടുപ്പിൽ ശരിദൂരം കണ്ടെത്തിയത്. അത് രാഷ്​ട്രീയമല്ല. എൻ.എസ്.എസി​​െൻറ പ്രവർത്തനങ്ങളിൽ രാഷ്​ട്രീയം കലർത്താൻ ആരെയും അനുവദിക്കില്ലെന്നും സുകുമാരൻ നായർ പറഞ്ഞു.