നഴ്​സുമാരുടെ സമരം: ആശുപത്രികളിലേക്കുള്ള പ്രവേശനം തടയരുതെന്ന്​ ഹൈകോടതി

കൊച്ചി: നഴ്​സുമാരുടെ സമരം നടക്കുന്ന ആശുപത്രികളിലേക്ക്​ ഡോക്​ടർമാരും രോഗികളുമടക്കമുള്ളവർക്ക്​ പ്രവേശനം നിഷേധിക്കരു​തെന്ന്​ ഹൈകോടതി. സമരം ആശുപത്രികളുടെ സുഗമമായ പ്രവർത്തനം തടയുന്ന വിധത്തിലാകരുത്​. സമരത്തെ തുടർന്ന്​ പൊലീസ്​ സംരക്ഷണം ആവശ്യപ്പെട്ട്​ തളിപ്പറമ്പ്​ ലൂർദ്​, കണ്ണൂർ ധനലക്ഷ്​മി, കണ്ണൂർ കൊയിലി എന്നീ ആശുപത്രികൾ നൽകിയ ഹരജികളിലാണ്​ ഉത്തരവ്​.

സമരത്തിലുള്ള നഴ്​സുമാർ ആശുപത്രിയിലേക്ക്​ ഡോക്​ടർമാരടക്കം പ്രവേശിക്കുന്നതിനെ തടയുന്നതായാണ്​ ഹരജിയിൽ ആരോപിച്ചത്​. വഴി തടഞ്ഞും രോഗികളെ കിടത്താൻ അനുവദിക്കാതെയും സംഘർഷാവസ്​ഥ സൃഷ്്​ടിക്കുകയാണ്​. അവശ്യസർവിസായ ആശുപത്രികൾ തടസ്സപ്പെടുത്തുന്നത്​ കോടതിവിധികളുടെ ലംഘനമാണെന്നും ജീവനുവരെ ഭീഷണിയുള്ള സാഹചര്യത്തിൽ പൊലീസ്​ സംരക്ഷണം അനുവദിക്കണമെന്നുമായിരുന്നു ആവശ്യം.

ആശുപത്രിയിലേക്കും പുറത്തേക്കുമുള്ള പ്രവേശനം തടയരുതെന്ന്​ കോടതി ഉത്തരവിട്ടു. എന്നാൽ, സമരം തീർക്കുന്നതി​​​െൻറ ഭാഗമായി സേവനവേതന ചർച്ചകൾ തുടരുന്നതിന്​ ഇൗ ഉത്തരവ്​ തടസ്സമല്ലെന്നും കോടതി വ്യക്​തമാക്കി.