റഷ്യയെ തള്ളി യെച്ചൂരി; അധിനിവേശമല്ല പ്രതിസന്ധിക്ക്​ പരിഹാരമെന്ന്

കൊച്ചി: യുക്രെയ്​നുമേലുള്ള റഷ്യൻ അധിനി​വേശത്തെ തള്ളി സി.പി.എം ജനറൽ സെക്രട്ടറി സീതാറാം യെച്ചൂരി. മറ്റൊരു രാജ്യത്തി​ന്‍റെ സുരക്ഷിതത്വത്തിന്​ ഭീഷണി സൃഷ്​ടിച്ച്​ ഒരു രാജ്യത്തിനും സുരക്ഷിതത്വം ശക്തിപ്പെടുത്താനാകില്ലെന്ന്​ പറഞ്ഞ അദ്ദേഹം, പുടിൻ ​റഷ്യയെ സങ്കുചിത ദേശീയതാവാദത്തിലേക്ക്​ കൊണ്ടുപോയിരിക്കുകയാണെന്നും കുറ്റപ്പെടുത്തി.

യുക്രെയ്നുമേലുള്ള റഷ്യൻ അധിനിവേശമല്ല പ്രതിസന്ധിക്ക്​ പരിഹാരം. അധിനിവേശം അടിയന്തരമായി അവസാനിപ്പിക്കണം. യു.എസ്​.എസ്​.ആർ ഇല്ലാതായപ്പോൾ അമേരിക്കൻ സാമ്രാജ്യത്വം ഗോർബച്ചേവിന്​ നൽകിയ വാക്ക്​ പാലിക്കാത്തതാണ്​ പ്രശ്​നത്തിന്​ കാരണം. ഇന്ന്​ അമേരിക്ക യുക്രെയ്ൻ ഒഴികെ ചെറുതും വലുതുമായ കിഴക്കൻ യൂറോപ്യൻ രാജ്യങ്ങളെ നാറ്റോയിൽ അംഗമാക്കി. ഒരു ലക്ഷത്തിലേറെയുള്ള നാറ്റോ സൈന്യം റഷ്യൻ അതിർത്തിയിൽ തമ്പടിച്ചിരിക്കുകയാണ്​.

ലെനിൻ യുക്രെയ്നിനു​ സ്വതന്ത്ര പദവി നൽകിയില്ലായിരുന്നുവെങ്കിൽ റഷ്യയുടെ ഭാഗമാകുമായിരുന്നുവെന്നാണ്​ പുടിന്‍റെ വാദം. ഇത്​ വളരെ പ്രത്യാഘാതം ഉണ്ടാക്കുന്നതാണ്​. ചൈന ഇന്ന്​ ലോകത്തെ രണ്ടാമത്തെ സാമ്പത്തിക ശക്തിയായി കഴിഞ്ഞു. നേരത്തേ ചൈനയെ മെരുക്കാനായിരുന്നു ശ്രമം. അതിന്ന്​ മെരുക്കി ഒറ്റപ്പെടുത്തുക എന്ന നിലയിലേക്ക്​ മാറി. അതിനായി യു.എസ്​ സാമ്രാജ്യത്വം അതി​ന്‍റെ എല്ലാ കൂട്ടാളികളെയും ഒരുമിച്ച്​ അണിനിരത്തുകയാണ്​. ഇതുവഴി തങ്ങളുടെ അധീശത്വത്തിന്​ എതിരായ വെല്ലുവിളിയെ നേരിടാമെന്ന്​ കരുതുന്നു. ഈ നടപടി അന്താരാഷ്​ട്ര സംഭവവികാസങ്ങളിൽ വലിയ പ്രത്യാഘാതം സൃഷ്​ടിക്കും.

ഗൾഫ്​ യുദ്ധത്തിലും ലിബിയൻ പ്രതിസന്ധിഘട്ടത്തിലും ആളുകളെ ഒഴിപ്പിച്ച്​ പരിചയമുള്ളതാണ്​ ഇന്ത്യൻ വിദേശകാര്യ മന്ത്രാലയം. എന്നാൽ, ഇന്ന്​ അത്​ ഉപയോഗപ്പെടുത്തുന്നില്ല. അതിന്​ സംവിധാനവും ഇല്ല. യുക്രെയ്​ൻ പ്രതിസന്ധിയിൽ ആളുകളെ തിരികെ എത്തിച്ചിട്ട്​ കേന്ദ്രമന്ത്രിമാർ ഫോട്ടോ സെഷൻ നടത്തുകയാണെന്നും യെച്ചൂരി പരിഹസിച്ചു.