തെരഞ്ഞെടുപ്പിനെ വര്‍ഗീയവത്​കരിക്കാൻ സി.പി.എം ശ്രമം -ഉമ്മൻ ചാണ്ടി

ചെങ്ങന്നൂര്‍: ചെങ്ങന്നൂര്‍ തെരഞ്ഞെടുപ്പിനെ വര്‍ഗീയവത്​കരിക്കാനും ജനങ്ങളില്‍ വര്‍ഗീയധ്രുവീകരണം നടത്താനും സി.പി.എം ശ്രമിക്കുകയാണെന്ന് മുന്‍ മുഖ്യമന്ത്രി ഉമ്മൻ ചാണ്ടി. അഖില ഭാരത അയ്യപ്പസേവ സംഘം ആർ.എസ്​.എസി​​​െൻറ പോഷകസംഘടനയാണെന്നും ഇതിലെ ഭാരവാഹിയായതിനാലാണ് യു.ഡി.എഫ് വിജയകുമാറിന് സീറ്റ് നല്‍കിയതെന്നുമ​ുള്ള സി.പി.എം സംസ്ഥാന സെക്രട്ടറി കോടിയേരി ബാലകൃഷ്ണ​​​െൻറ ലേഖനം പരാജയഭീതിയില്‍നിന്ന്​ ഉണ്ടായതാണെന്നും അദ്ദേഹം വാർത്തസമ്മേളനത്തില്‍ പറഞ്ഞു.

അയ്യപ്പസേവ സംഘം വര്‍ഗീയസംഘടനയല്ല. അത് ഒരു സേവനസന്നദ്ധ സംഘടനയാണ്. അയ്യപ്പസേവസംഘത്തെ ആർ.എസ്​.എസുമായി ബന്ധപ്പെടുത്തി കോടിയേരി നടത്തിയ പ്രസ്താവനയില്‍ പ്രതിഷേധിക്കു​െന്നന്നും പ്രസ്താവന പിന്‍വലിക്കണമെന്നും ഉമ്മൻ ചാണ്ടി ആവശ്യപ്പെട്ടു. കാവി ഉടുക്കുന്നവരും ചന്ദനക്കുറി ഇടുന്നവരും അമ്പലത്തില്‍ പോകുന്നവരുമെല്ലാം ആർ.എസ്​.എസ്​ ആണെന്ന്​ പറഞ്ഞാല്‍ അംഗീകരിക്കില്ല. വിഭാഗീയത സൃഷ്​ടിച്ച് വോട്ടുതട്ടാന്‍ ആർ.എസ്​.എസും ബി.ജെ.പിയും നടത്തുന്ന അതേ നീക്കംതന്നെയാണ് സി.പി.എമ്മും നടത്തുന്നത്​. ഇത്തരം പ്രചാരണത്തിലൂടെ യു.ഡി.എഫി​​​െൻറ ഒരുവോട്ടുപോലും കുറയില്ല.

പ്രചാരണം അവസാനഘട്ടത്തിലെത്തിയപ്പോള്‍ പരാജയം നേരിടുമെന്ന പരിഭ്രാന്തിയിലാണ് സി.പി.എം. ബി.ജെ.പി മുന്നേറുകയാണെന്ന ഭീതി ജനങ്ങള്‍ക്കിടയില്‍ പരത്തി വോട്ട് തട്ടാനാണ് സി.പി.എം ശ്രമിക്കുന്നത്. ഇതിനെ യു.ഡി.എഫ് ശക്തമായി നേരിടും. ഭരണ വിലയിരുത്തലാകും തെരഞ്ഞെടുപ്പെന്ന വി.എസി​​​െൻറ അഭിപ്രായമാണോ പാര്‍ട്ടിക്കും മുഖ്യമന്ത്രിക്കുമെന്നും അദ്ദേഹം ചോദിച്ചു.വാർത്തസമ്മേളനത്തിൽ കെ.പി.സി.സി വൈസ് പ്രസിഡൻറ്​ വി.ഡി. സതീശന്‍, എന്‍.കെ. പ്രേമചന്ദ്രന്‍ എം.പി, കെ.സി. ജോസഫ് എം.എല്‍.എ, തെരഞ്ഞെടുപ്പ് കമ്മിറ്റി കണ്‍വീനര്‍ എബി കുര്യാക്കോസ് എന്നിവരും പങ്കെടുത്തു.