പ്രാർഥനയിലൂടെ ഞാൻ ആ മുറിവുണക്കും...

മുൻ മുഖ്യമ​​ന്ത്രിയും ​മുതിർന്ന കോൺഗ്രസ് നേതാവുമായിരുന്ന ഉമ്മൻ ചാണ്ടി വിടവാങ്ങിയിട്ട് ഇന്നേക്ക് ഒരാണ്ട്. ജനങ്ങളുടെ പ്രിയനേതാവായിരുന്ന അദ്ദേഹത്തോടൊപ്പം താണ്ടിയ വഴിദൂരവും, അനാവശ്യ വിവാദങ്ങൾ അവസാന നാളുകളിൽ സൃഷ്ടിച്ച വെല്ലുവിളികളും വേദനകളും ഓർത്തുപറയുന്നു പത്നി മറിയാമ്മ ഉമ്മൻ

നാൽപത്തിയാറു വർഷം കൈപിടിച്ചുനടന്നയാൾ പോയതിന്‍റെ ശൂന്യതയിലാണ്​ ഞാനിപ്പോഴും. ദുഃഖമുറഞ്ഞ് മരവിച്ച ആ നാളുകളി​ലെന്നോ മനസ്സിൽ കയറിവന്ന വാചകമായിരുന്നു മുപ്പിരിച്ചരട്​​ (മൂന്നുപിരിയുള്ള ചരട്​) വേഗത്തിൽ അറ്റുപോകില്ലെന്നത്​. എവിടെയാണത്​ കേട്ടതെന്ന് ഓർമ കിട്ടിയിരുന്നില്ല. ബൈബിളിലെ സഭപ്രസംഗിയിലാണെന്ന്​​ പിന്നീടോർത്തു​. ​ഭർത്താവും ​ഭാര്യയും ​ദൈവവും ചേർന്നതാണ്​ മുപ്പിരിച്ചരട്​. ​ദൈവം കൂ​ടെയുള്ളപ്പോൾ ഭാര്യയെയും ഭർത്താവിനെയും പിരിക്കാനാവില്ല. മരണദുഃഖത്തിൽനിന്ന്​ എന്നെ എഴുന്നേൽപിച്ചത്​ ആ വാചകമാണ്​.

ആൾക്കൂട്ടത്തിനു നടുവിൽ കഴിഞ്ഞിരുന്നൊരാൾ അവസാന നാലുമാസം ആരോടും മിണ്ടാനാവാതെ ജീവിതം ജീവിച്ചുതീർക്കുകയായിരുന്നു. രോഗപീഡയെക്കാൾ മനോവിഷമമായിരുന്നു​ കുഞ്ഞിനെ നീറ്റിയിരുന്നത്​. ഹൃദയം പൊട്ടിയാണ്​ അദ്ദേഹം​ പോയത്​. അ​ദ്ദേഹത്തെ കൊല്ലാക്കൊല ചെയ്തു. എല്ലാവരോടും ക്ഷമിക്കാനേ കഴിയൂ. എന്‍റെ പ്രാർഥനയിൽ അവരുമുണ്ടാവും. ആരെയും കുറ്റം പറയുന്നത്​ കുഞ്ഞിനിഷ്ടമല്ല. ചെയ്തതെല്ലാം തെറ്റായിപ്പൊയെന്ന്​ അവർ സ്വയം തിരിച്ചറിയട്ടെ.

ആരോപണങ്ങളുടെ മുൾമുനയിൽ സമാധാനമായി ഉറങ്ങാൻ പോലും കഴിയാതിരുന്ന നാളുകളെ അതിജീവിച്ചു. എന്നോളം മുറിവേറ്റ സ്ത്രീ വേ​റെയുണ്ടാവില്ല. ഹൃദയം പൊട്ടിയൊലിച്ച സമയത്ത്​ ചിലർ തീപ്പന്തം ​കൊണ്ട്​​ കുത്തി. ആഴമേറിയ ആ മുറിവുകൾ ഉണങ്ങാൻ സമയമെടുക്കും. ശത്രുക്കളാരെങ്കിലുമായിരുന്നെങ്കിൽ​ ഇത്ര വേദന വരില്ല. ആരോപണമുന്നയിച്ച ആ സ്ത്രീയെ കണ്ടാൽ ഞാനാദ്യം പറയുക ദൈവം അനുഗ്രഹിക്കട്ടെ എന്നായിരിക്കും. എന്നിട്ട്​ ചോദിക്കണം, എന്തിനായിരുന്നു ആ പാവത്തെ കള്ളം പറഞ്ഞ്​ ഇല്ലാതാക്കിയതെന്ന്​. കുഞ്ഞ് ഒരിക്കൽ പോലും അവരെക്കുറിച്ച് മോശമായി പറഞ്ഞിട്ടില്ല. 24 മണിക്കൂറും ആൾക്കൂട്ടത്തിനൊപ്പമുണ്ടായിരുന്ന വ്യക്തിയെക്കുറിച്ചാണ്​ ഇങ്ങനെയൊക്കെ ചെയ്തെന്നുപറഞ്ഞത്.

ആശുപത്രിയിൽ വെച്ച്​ ഒരു ദിവസം ഞാൻ കുഞ്ഞിനോട് പറഞ്ഞു ‘‘അസുഖം മാറി തിരിച്ച് ഫ്ലൈറ്റിൽ നമുക്ക്​ നാട്ടിലേക്ക്​ മടങ്ങണം. പഴയ ആളുകൾക്കൊക്കെ ഡിന്നർ നൽകണം. കാരവാനിൽ എ.കെ. ആന്‍റണിയെയും വയലാർ രവിയെയുമൊക്കെ കാണണം. കേരളം മുഴുവൻ കറങ്ങണം’’. അദ്ദേഹം അ​തൊക്കെ തലയാട്ടി സമ്മതിച്ചു. പക്ഷേ, തിരിച്ചുവരവുണ്ടായില്ല. ചികിത്സ സംബന്ധിച്ച വിവാദങ്ങളും ഏറെ മനഃപ്രയാസമുണ്ടാക്കി. ഞാൻ പക്ഷേ, അതൊന്നും ശ്രദ്ധിച്ചില്ല. അസുഖം മാറി അദ്ദേഹം തിരിച്ചുവരുമ്പോൾ ആരോപണം ഉന്നയിക്കുന്നവരുടെ വായടയുമല്ലോ എന്നു കരുതി. അതിനും സാധിച്ചില്ല. കുഞ്ഞ്​ പോയ ശേഷം 41 ദിവസവും വീട്ടിൽ കെടാവിളക്ക്​ എരിഞ്ഞിരുന്നു. അതിനുശേഷം എല്ലാ ദിവസവും രാത്രി കിടക്കുന്നതുവരെ കുഞ്ഞിന്‍റെ ചിത്രത്തിനു മുന്നിൽ വിളക്ക്​ തെളിക്കും. ഭക്ഷണം കഴിക്കു​മ്പോൾ മൂന്നുനേരവും മുന്നിൽ ഒരു പ്ലേറ്റ്​ വെക്കും. വലതുവശത്ത്​ ഞാനിരിക്കും.

അസാധാരണ വ്യക്തിയായിരുന്നു കുഞ്ഞ്. എപ്പോഴും ശാന്തൻ. അമ്മ പറയാറുണ്ട്​, കുട്ടിക്കാലത്ത്​ കരയാറുപോലുമുണ്ടായിരുന്നില്ലെന്ന്. ഞാൻ വിഷമിക്കുന്നതുകണ്ടാലും ആശ്വസിപ്പിക്കാറില്ല, ഉപദേശവുമില്ല. കൂടിപ്പോയാൽ, വിഷമിക്കരുത്​ എന്നു മാത്രം പറയും. വീട്ടുകാര്യങ്ങളെല്ലാം ഞാനാണ്​ നോക്കിയിരുന്നത്​. ഒന്നിനും കണക്ക്​ ചോദിക്കില്ല. ചാണ്ടിയാണ്​ അപ്പയെ മിസ്​ ചെയ്യുന്നെന്ന്​ എപ്പോഴും പറയാറുള്ളത്​. അവൻ സ്​നേഹം പ്രകടിപ്പിക്കുന്ന കൂട്ടത്തിലാണ്​. എന്നോടിതുവരെ കുഞ്ഞ്​ ദേഷ്യപ്പെട്ട്​ സംസാരിച്ചിട്ടില്ല. എന്നാൽ, സ്​നേഹം പ്രകടിപ്പിക്കുകയുമില്ല. ആ തണൽ നഷ്ടമായതിന്‍റെ വേദന മരണശേഷമാണ്​ മനസ്സിലാവുന്നത്​. കുടുംബജീവിതത്തിൽ സന്തോഷവും സങ്കടവും ഏറെ അനുഭവിച്ചിട്ടുണ്ട്​. അപ്പോഴൊന്നും കുഞ്ഞിനെ അമിതമായി സങ്കടപ്പെട്ടോ സ​ന്തോഷിച്ചോ കണ്ടിട്ടില്ല. 2021നുശേഷം രാഷ്ട്രീയത്തിലെ ചില സംഭവവികാസങ്ങളോ​ടെ അദ്ദേഹം കൂടുതൽ മൗനിയായി.

മനഃപ്രയാസമായിരുന്നു അവസാനകാലത്ത്​ അലട്ടിയത്​. അദ്ദേഹം അനുഭവിച്ച വേദനയുമായി തട്ടിച്ചുനോക്കുമ്പോൾ എന്‍റേത്​ ഒന്നുമല്ല. ആളുകളെ സഹായിക്കുകയായിരുന്നു​ കുഞ്ഞിന്‍റെ നിയോഗം. എന്‍റേത്​ പ്രാർഥനയും. കള്ളങ്ങൾ ആരോപിച്ച ആ വനിതക്കു വേണ്ടി മാത്രമല്ല, ദ്രോഹിച്ച എല്ലാവർക്കും വേണ്ടിയും ഞാൻ പ്രാർഥിക്കും. പ്രാർഥനയിലൂടെ ആ വലിയ മുറിവുണക്കും.

തയാറാക്കിയത്: ഷീബ ഷൺമുഖൻ