ഒാരോ താലൂക്കിനെയും ഒാരോ യുണിറ്റായി കണ്ട്​ പ്ലസ്​ വൺ സീറ്റ്​ ഉറപ്പാക്കുകയാണ്​ വേണ്ടത്​​; പൊതു വിദ്യാഭ്യാസത്തെ സർക്കാർ ദുർബലപ്പെടുത്തുകയാണെന്ന്​ പ്രതിപക്ഷം

തിരുവനന്തപുരം: കഴിഞ്ഞ തവണ ഒാപ്പൺ സ്​കൂളിനെ ആശ്രയിച്ചതിനേക്കാൾ മൂന്നിരട്ടി കുട്ടികൾ ഇത്തവണ ഒാപ്പൺ സ്​കൂളിനെ ആശ്രയിക്കേണ്ട അവസ്​ഥയാണെന്ന്​ പ്രതിപക്ഷ നേതാവ്​ വി.ഡി. സതീശനും ഉപനേതാവ്​ പി​.കെ. കുഞ്ഞാലിക്കുട്ടി പറഞ്ഞു. ലക്ഷത്തിലധികം കുട്ടികൾക്ക്​ പ്ലസ്​വൺ സീറ്റ്​ ലഭിക്കാത്ത സാഹചര്യമാണ്​ ഈ വർഷം സംസ്​ഥാനത്തുള്ളതെന്നും അവർ പറഞ്ഞു.

പ്ലസ്​വണിന്​ ഈ വർഷം പുതിയ ബാച്ച്​ അനുവദിക്കില്ലെന്ന തീരുമാനത്തെ കുറിച്ച്​ മാധ്യമങ്ങളോട്​ സംസാരിക്കുകയായിരുന്നു ഇരുവരും.

സംസ്​ഥാനത്തെയാകെ ഒരു യൂണിറ്റായി കണ്ടാണ്​ സർക്കാർ സീറ്റുകളുടെ എണ്ണം സംബന്ധിച്ച കണക്ക്​ പറയുന്നത്​. ഇത്​ ഒട്ടും പ്രായോഗികമല്ല. ഒാരോ താലൂക്കിനെയും ഒാരോ യുണിറ്റായി കണ്ട്​ സീറ്റുകൾ ഉറപ്പുവരുത്തുകയാണ്​ സർക്കാർ ചെയ്യേണ്ടത്​. സംസ്​ഥാനത്ത്​ ചില ഭാഗങ്ങളിൽ ഉയർന്ന മാർക്കോടെ വിജയിച്ചവർക്ക്​ പോലും പ്ലസ്​വണ്ണിന്​ ആഗ്രഹിച്ച വിഭാഗത്തിൽ സീറ്റില്ലാത്ത സ്​ഥിതിയാണെന്ന്​ അവർ പറഞ്ഞു.

സീറ്റ്​ വർധിപ്പിക്കുന്നതിന്​ പകരം മറ്റു പരിഹാരങ്ങൾ കാണണമെന്ന്​ കോടതി തന്നെ നേരത്തെ ആവശ്യപ്പെട്ടതാണ്​. ബാച്ചുകളുടെ എണ്ണം കൂട്ടണം. 50 കുട്ടികൾക്ക്​ മാത്രമായി സജീകരിച്ച ക്ലാസിൽ കുട്ടികളുടെ എണ്ണം വർധിപ്പിക്കുന്നത്​ ശാസ്​ത്രീയമല്ല.

ബാച്ചുകൾ വർധിപ്പിച്ച്​ കുട്ടികൾക്ക്​ സീറ്റുറപ്പാക്കുന്നതിന്​ പകരം പൊതുവിദ്യാഭ്യാസത്തെ ദുർബലപ്പെടുത്തുന്ന സമീപനമാണ്​ സർക്കാറി​േന്‍റത്​. സംസ്​ഥാനത്തെ രക്ഷിതാക്കളുടെ ആശങ്കയാണ്​ പ്രതിപക്ഷം സർക്കാറിന്‍റെ ശ്രദ്ധയിൽ ​കൊണ്ടുവന്നത്​. നേരത്തെ തന്നെ പ്രതിപക്ഷം ഉന്നയിക്കുന്ന ഈ വിഷയത്തിൽ സർക്കാറിന്​ നിഷേധാത്മക നിലപാടാണെന്നും ഇരുവരും നിയമസഭ മീഡിയറൂമിൽ നടന്ന വാർത്താ സമ്മേളനത്തിൽ പറഞ്ഞു.