സുധാകര​െൻറ വെളിപ്പെടുത്തൽ:  കോൺ​ഗ്രസും മുസ്​ലിംലീഗും നിലപാട്​ വ്യക്തമാക്കണം -പി. ജയരാജൻ 

കണ്ണൂർ:  ബി.ജെ.പിയിലേക്കുള്ള ക്ഷണം സംബന്ധിച്ച കെ. സുധാകര​​​െൻറ വെളിപ്പെടുത്തലിനെക്കുറിച്ച് കോൺഗ്രസ്​ നേതൃത്വം നിലപാട് വ്യക്തമാക്കണമെന്ന്​ സി.പി.എം ജില്ല സെക്രട്ടറി പി. ജയരാജൻ വാർത്തസമ്മേളനത്തിൽ ആവശ്യപ്പെട്ടു. തനിക്ക് ബി.ജെ.പിയിൽ പോകണമെന്ന് തോന്നിയാൽ പോകും. മറ്റാരെയും ബോധ്യപ്പെടുത്തേണ്ട ആവശ്യമില്ല എന്നാണ്​ സുധാകരൻ പറഞ്ഞത്​. കോൺഗ്രസ്​ അണികളെ സംഘപരിവാരത്തിലേക്ക് ആനയിക്കാനുള്ള സുധാകര​​​െൻറ നീക്കത്തെക്കുറിച്ച്  മുസ്​ലിംലീഗ്​ നിലപാട്​ വ്യക്തമാക്കണം.  

സുധാകരനും ആർ.എസ്.​എസും ഇരുമെയ്യാണെങ്കിലും ഒറ്റമനസ്സാണ്. ബി.ജെ.പി ക്ഷണം സംബന്ധിച്ച്​ കെ. സുധാകരൻ വെളിപ്പെടുത്തിയത്​ പാതിമാത്രമാണ്​. ബാക്കി വരുംദിവസങ്ങളിൽ രാഷ്​ട്രീയത്തിൽ കാണാം. സുധാകരനും അമിത്​ഷായും തമ്മിൽ  ചെന്നൈയിൽ ചർച്ച നടത്തിയെന്ന്​ സി.പി.എം നേരത്തേ പറഞ്ഞതാണ്​. അന്ന്​ എല്ലാം നുണയെന്ന്​ പറഞ്ഞ സുധാകരൻ ഇപ്പോൾ ക്ഷണം കിട്ട​ിയെന്ന്​ സമ്മതിച്ചിരിക്കുന്നു. കെ.പി.സി.സി പ്രസിഡൻറ്​ സ്​ഥാനം കിട്ടുന്നില്ലെങ്കിൽ ബി.ജെ.പിയിലേക്ക്​ പോകുമെന്ന മുന്നറിയിപ്പാണ്​ ഇതിലൂടെ സുധാകരൻ കോൺഗ്രസ്​ നേതൃത്വത്തിന്​ നൽകുന്നത്​. 

 സി.പി.എമ്മിനെ എതിരിടാൻ കോൺഗ്രസിന് ആവില്ലെന്ന തോന്നലുണ്ടാക്കുക, ശേഷം തനിക്ക്​  പിന്നിൽ അണിനിരക്കുന്നവരെ ബി.ജെ.പിയിലേക്ക് ചേക്കേറാൻ േപ്രരിപ്പിക്കുക. അതാണ്​ സുധാകരൻ ചെയ്യുന്നത്​. ‘കേരളത്തിലെ രാഷ്​ട്രീയ വികസനത്തിനുള്ള തന്ത്രപരമായ പദ്ധതി’ എന്ന പേരിൽ അമിത് ഷായുടെ ഓഫിസിൽ തയാറാക്കിയതാണിത്​.  സുധാകര​​​െൻറ സത്യഗ്രഹപന്തൽ ആർ.എസ്​.എസ്​ നേതാവ് വത്സൻ തില്ലങ്കേരി  സന്ദർശിച്ചത്​ യാദൃച്ഛികമല്ല.  സുധാകര​​​െൻറ സത്യഗ്രഹംപോലും ബി.ജെ.പി താൽപര്യപ്രകാരമാണെന്നും പി. ജയരാജൻ കുറ്റ​െപ്പടുത്തി.