പാട്ടും പാർട്ടിയും പിന്നെ ക്യാപ്​റ്റനും; പി​.ജെ പറയാതെ പറയുന്നത്​ പലതും...

'കണ്ണൂരിന്‍ താരകമല്ലോ ചെഞ്ചോരപ്പൊന്‍കതിരല്ലോ...

നാടിന്‍ നെടുനായകനല്ലോ

പി ജയരാജന്‍ ധീരസഖാവ്...

ചെമ്മണ്ണിന്‍ മാനം കാക്കും

നന്മകള്‍ തന്‍ പൂമരമല്ലോ..

ചെങ്കൊടി തന്‍ നേരതു കാക്കും

നേരുള്ളൊരു ധീരസഖാവ്.....'പാർട്ടിയിലെ ചിലർ ഇങ്ങനെയൊരു പാ​ട്ടെഴുതി സഖാവ്​ പി.ജെയോടുള്ള ഇഷ്​ടം പ്രകടിപ്പിച്ചിട്ട്​ മൂന്നര വർഷം കഴിയുന്നു. എന്നാൽ, സി.പി.എം പുറമേരി നോർത്ത്​ ബ്രാഞ്ചിന്‍റെ നേതൃത്വത്തിൽ ഇറക്കിയ ആ പാട്ടിനെ തള്ളാനോ കൊള്ളാനോ വയ്യാത്ത അവസ്​ഥയിലായിരുന്നു പി. ജയരാജൻ ഇതുവരെ. താൻ സ്വയം മഹത്വവല്‍ക്കരിക്കുന്നു എന്ന്​ സംസ്ഥാന കമ്മിറ്റിയിൽ വിമർശനമുയർന്നതിനുപിന്നാലെ വാഴ്​ത്തുപാട്ടുകളോടും സ്​തുതിഗീതങ്ങളോടുമൊക്കെ അകലം. ഇതിനു പിന്നാ​ലെ വടകരയിലെ പാർലമെന്‍റ്​ തെരഞ്ഞെടുപ്പിൽ തോൽവി, ജില്ല സെക്രട്ടറി സ്​ഥാനത്തുനിന്ന്​ പടിയിറക്കം...ഒടുവിൽ നിയമസഭാ തെരഞ്ഞെടുപ്പിൽ സ്​ഥാനാർഥിപ്പട്ടികയിൽനിന്നും പുറത്ത്​. പ്രിയ പി.ജെയെ പരിഗണിക്കാത്തതിനെതിരെ ആർമി രംഗത്തിറങ്ങി പ്രതിഷേധിച്ചെങ്കിലും പാർട്ടിയാണ്​ വലുതെന്ന്​ സഖാവ്​ ഉറക്കെപ്പറഞ്ഞ്​ ആ പ്രതിഷേധത്തിന്‍റെ കനൽ കെടുത്തി.

ഇന്നിപ്പോൾ പി.ജെ ആവർത്തിച്ചു പറഞ്ഞതും അതുതന്നെയാണ്​ -'പാർട്ടിയാണ്​ വലുത്'​. അതോടൊപ്പം അദ്ദേഹം ചിലതുകൂടി പറഞ്ഞെന്നുമാത്രം. ക്യാപ്​റ്റൻ എന്നാൽ പാർട്ടിയാണെന്ന്​ പറയു​ന്നതിനൊപ്പം ഈ പാർട്ടിയിൽ 'എല്ലാവരും സഖാക്ക'ളാണ് എന്നും പി.ജെ. പറഞ്ഞുവെക്കുന്നുണ്ട്​. വ്യക്​തികളല്ല ജനങ്ങളുടെ ഉറപ്പെന്നും കമ്യൂണിസ്റ്റുകാർ വ്യക്തിപൂജയിൽ അഭിരമിക്കുന്നവരല്ല എന്നും അദ്ദേഹം മുഖപുസ്​തകത്തിലൂടെ ഓർമപ്പെടുത്തുന്നു​. അക്കൂട്ടത്തിൽ 'ജനങ്ങളോട് ചേർന്നു നിൽക്കുമ്പോൾ അവർ സ്നേഹഹസൂചകമായി പല തരത്തിലും ഇഷ്ടം പ്രകടിപ്പിക്കും. ചിലർ പാട്ടെഴുതി ഇഷ്ടം പ്രകടിപ്പിക്കും, ചിലർ ഫോട്ടോ വെച്ച് ഇഷ്ടം പ്രകടിപ്പിക്കും, ചിലർ ടാറ്റു ചെയ്തു ഇഷ്ടം പ്രകടിപ്പിക്കും...' എന്ന വരികളാണ്​ ഇന്നത്തെ എഫ്​.ബി പോസ്റ്റിൽ ഏറ്റവും കൈയടി നേടിയത്​.

ആളുകൾക്ക്​ താൽപര്യം വരു​േമ്പാൾ പലതും (ക്യാപ്​റ്റൻ) വിളിക്കുമെന്നും അതൊന്നുമെടുത്തിട്ട്​ ആശയക്കുഴപ്പമുണ്ടാക്കാൻ കഴിയില്ലെന്നും മുഖ്യമന്ത്രി പറഞ്ഞതിന്​ തൊട്ടുപിന്നാലെയാണ്​ മറുകുറിപ്പിന്‍റെ സ്വഭാവമുള്ള മുനവെച്ച പോസ്റ്റ്​. മഹത്വവത്​കരിക്കുന്നുവെന്ന്​ തന്നെ കുറ്റപ്പെടുത്തിയവർ ക്യാപ്​റ്റൻ വിളി ഉൾപെടെയുള്ള വ്യക്​തിപൂജകളോട്​ സമരസപ്പെടുന്നതിലെ നീരസമാണ്​ പി.ജെ.യുടെ പ്രതികരണത്തിൽ മുഴച്ചുനിൽക്കുന്നത്​ എന്ന്​ കരുതുന്നവരുമേറെ.

തന്നോടുള്ള ഇഷ്​ടം കൊണ്ടാണ്​ ചിലർ പാട്ടുപാടിയതെന്ന്​ പറയാൻ പി.ജെ മൂന്നര വർഷം കാത്തുനിന്നു. അതിനുള്ള അവസരം ഒത്തുവന്നത്​ (നിർ)ഭാഗ്യവശാൽ തെരഞ്ഞെടുപ്പിന്​ തൊട്ടുമുമ്പാണെന്ന്​ മാത്രം. പാട്ടും നൃത്തശിൽപവും പുറച്ചേരി ഗ്രാമീണ കലാവേദിയുടെ ബാനറിൽ പുറത്തിറക്കിയ ജീവിതരേഖയുംവെച്ച്​ പാര്‍ട്ടിക്ക് അതീതനായി വളരാനാണ് ജയരാജന്‍റെ നീക്കമെന്നും അത് അനുവദിക്കാനാകില്ലെന്നും അന്ന്​ സംസ്ഥാന സമിതി വിലയിരുത്തി വിമർശിച്ചത്​ മനസ്സിൽവെച്ചുതന്നെയാകണം, വ്യക്​തികളല്ല ജനങ്ങളുടെ ഉറപ്പാണ്​ മുഖ്യമെന്ന്​ പി.ജെ ഉറപ്പിച്ചുപറയുന്നത്​. ഇപ്പോള്‍ സമാനമായ രീതിയില്‍ വ്യക്തിപൂജ വിവാദം മുഖ്യമന്ത്രിക്കെതിരേ ഉയരുന്ന സാഹചര്യത്തിൽ പരോക്ഷമായ വിമര്‍ശനം തന്നെയാണ്​ പി.ജെ ഉന്നംവെക്കുന്നതെന്ന്​ വ്യക്​തം.

ഫേസ്​ബുക്കിൽ മാത്രം 37000ൽ അധികം വിശ്വസ്​ത ഭടന്മാർ അണിനിരക്കുന്ന പി.ജെ ആർമി ​ഗ്രൂപ്​, തങ്ങളുടെ സഖാവിന്‍റെ വാക്കുകൾ കൊണ്ടാടുന്നത്​ സ്വാഭാവികം. രണ്ട്​ മണിക്കൂറിൽ ഏഴായിരത്തിലധികം ലൈക്കും ആയിരത്തോളം കമന്‍റുകളുമൊക്കെയായി ക്ഷണത്തിൽ കുറിപ്പ്​ വൈറലാകു​േമ്പാൾ പാർട്ടിക്കുള്ളിൽ ആശയക്കുഴപ്പം സർവത്ര. മുഖ്യമന്ത്രിയുടെ ജനപ്രിയതയെക്കുറിച്ചാണ്​ പറയുന്നത്​. ഊന്നുന്ന​താക​ട്ടെ വ്യക്​തിപൂജക്കും ക്യാപ്​റ്റൻ വിളിക്കുമെതിരെയും. വിവിധ മാനങ്ങളുള്ള കുറിപ്പിലൂടെ ജയരാജൻ ചിലതൊക്കെ പറയാതെ പറയുക തന്നെയാണ്​.