പി.വി. അൻവർ എം.എൽ.എക്ക് പി. ശശിയുടെ നോട്ടീസ്

തലശ്ശേരി: പി.വി. അൻവർ എം.എൽ.എക്ക് മുഖ്യമന്ത്രിയുടെ പൊളിറ്റിക്കൽ സെക്രട്ടറി പി. ശശിയുടെ വക്കീല്‍ നോട്ടീസ്. പൊതുജനമധ്യത്തിൽ അപമാനിക്കുന്നതിനായി അടിസ്ഥാനരഹിതമായ ആരോപണം ഉന്നയിച്ചതായും ഇത് പിൻവലിച്ച് നിർവ്യാജം ഖേദപ്രകടനം നടത്തണമെന്നും ആവശ്യപ്പെട്ടാണ് തലശ്ശേരിയിലെ അഡ്വ. കെ. വിശ്വൻ മുഖേന നോട്ടീസയച്ചത്.

കഴിഞ്ഞ 17ന് പാലക്കാട് വാർത്തസമ്മേളനത്തിൽ ശശിക്കെതിരെ വീണ്ടും അടിസ്ഥാനരഹിതമായ ആരോപണം ഉന്നയിച്ച് തന്റെ കക്ഷിയെ തേജോവധം ചെയ്യാനാണ് പി.വി. അൻവർ എം.എൽ.എ ശ്രമിച്ചിട്ടുള്ളതെന്ന് നോട്ടീസിൽ പറയുന്നു. കേരളത്തിലെ വിവിധ ജില്ലകളിൽ മുഖ്യമന്ത്രിയുടെ പൊളിറ്റിക്കൽ സെക്രട്ടറി പി. ശശിക്ക് നിരവധിയായ പെട്രോൾ പമ്പുകൾ ബിനാമിയായുണ്ട്. ഇപ്പോൾ പ്രവർത്തിച്ചുകൊണ്ടിരിക്കുന്നതും പുതുതായി നിർമിച്ചുകൊണ്ടിരിക്കുന്നതുമായ ഒരു മേഖലയിൽ പി. ശശിയുടെ വലിയ ഇൻവെസ്റ്റ്മെന്റുണ്ടെന്ന പ്രസ്താവനക്കെതിരെയാണ് നോട്ടീസ്.