കെ.എച്ച്.ആർ.ഐയുടെ 125 പരിശോധനകൾക്ക് ദേശീയ അം​ഗീകാരം ലഭിച്ചുവെന്ന് പി.എ. മു​ഹമ്മദ് റിയാസ്

തിരുവനന്തപുരം: കേരള ഹൈവേ റിസർച്ച് ഇൻസ്റ്റിറ്റ്യൂട്ടിന്റെ (കെ.എച്ച്.ആർ.ഐ) 125 പരിശോധനകൾക്ക് ദേശീയ ​ഗുണനിലവാര ഏജൻസിയായ എൻ.എബി.എല്ലിന്റെ (നാഷനൽ അക്രഡിറ്റേഷൻ ബോർഡ് ഫോർ ടെസ്റ്റിങ് ആൻഡ് കാലിബ്രേഷൻ ലബോറട്ടറീസ്) അം​ഗീകാരം ലഭിച്ചതായി മന്ത്രി പി.എ. മു​ഹമ്മദ് റിയാസ്. കാര്യവട്ടം കെ.എച്ച്.ആർ.ഐ ആസ്ഥാനത്ത് എൻ.എ.ബി.എൽ അം​ഗീകാരം ലഭിച്ചതിന്റെ ഔദ്യോ​ഗിക പ്രഖ്യാപനം നടത്തുകയായിരുന്നു അദ്ദേഹം. ഈ വർഷം തുടക്കത്തിൽ 68 പരിശോധനകൾക്ക് മാത്രമാണ് അം​ഗീകാരമുണ്ടായിരുന്നത്. ജൂണിൽ 57 പരിശോധനകൾക്ക് കൂടി അം​ഗീകാരം ലഭിച്ചു.

കെ.എച്ച്.ആർ.ഐ അന്തർദേശീയ നിലവാരത്തിൽ ഉയർത്തും. ഘട്ടം ഘട്ടമായി ആ ലക്ഷ്യത്തിലേക്ക് നീങ്ങുകയാണെന്നും നിർമാണ മേഖലക്ക് വലിയ മുതൽക്കൂട്ട് ആണ് ഈ നേട്ടമെന്നും മന്ത്രി പറഞ്ഞു. നിർമാണ വസ്തുക്കൾ, മണ്ണ്, എൻ.ഡി.ടി (നോൺ ഡിസ്ട്രക്റ്റീവ് ടെസ്റ്റിങ്) എന്നീ മൂന്ന് വിഭാഗങ്ങളിൽ ഏറ്റവും അധികം പരിശോധന നടക്കുന്ന രാജ്യത്തെ ഏക സർക്കാർ സ്ഥാപനമെന്ന നേട്ടം ഇതോടെ കെ.എച്ച്.ആർ.ഐ ക്ക് ലഭിച്ചു.