പാലക്കാട് കോൺഗ്രസിൽ വീണ്ടും കൊഴിഞ്ഞുപോക്ക്; മഹിളാ കോൺഗ്രസ് ജില്ലാ സെക്രട്ടറി സി.പി.എമ്മിൽ

പാലക്കാട്: പാലക്കാട് കോൺഗ്രസിൽ വീണ്ടും കൊഴിഞ്ഞുപോക്ക്. മഹിളാ കോൺഗ്രസ് ജില്ലാ സെക്രട്ടറി കൃഷ്ണകുമാരി സി.പിഎമ്മിൽ. കൃഷ്ണകുമാരിയെ സി.പി.എം ജില്ലാ സെക്രട്ടറി ഇ. എൻ. സുരേഷ് ബാബു പാർട്ടിയിലേക്ക് സ്വാഗതം ചെയ്തു.

2020 മുതൽ ജില്ലയിൽ കോൺഗ്രസ്-ബി.ജെ.പി കൂട്ടുകെട്ടാണെന്നും ഒരു നാണയത്തിന്റെ രണ്ട് വശങ്ങളല്ല ഒരു നാണയം തന്നെയാണ് ഇരു പാർട്ടികളെന്നും കൃഷ്ണകുമാരി പറഞ്ഞു. പഞ്ചായത്ത് തലത്തിലും വാർഡ് തലത്തിലും ആളുകൾക്ക് അറിയുന്ന കാര്യമാണിത്. ഈ വിഷയം ഉന്നയിച്ചപ്പോൾ പാർട്ടി അവഗണിക്കുകയാണ് ചെയ്തതെന്ന് കൃഷ്ണകുമാരി പറഞ്ഞു.

കോൺഗ്രസ് ബി.ജെ.പി കൂട്ടുകെട്ടിൽ പ്രതിഷേധിച്ചാണ് കൃഷ്ണകുമാരി സി.പി.എമ്മുമായി സഹകരിച്ച് പ്രവർത്തിക്കാൻ തീരുമാനിച്ചതെന്ന് ഇ. എൻ. സുരേഷ് ബാബു വാർത്താസമ്മേളനത്തിൽ പറഞ്ഞു. കൃഷ്ണകുമാരിയുടെ വാർഡിൽ കോൺഗ്രസിനും ബി.ജെ.പിക്കും ഒരേ സ്ഥാനാർഥിയാണുണ്ടായിരുന്നതെന്നും അദ്ദേഹം പറഞ്ഞു.