തദ്ദേശ തെരഞ്ഞെടുപ്പ്​; വോ​ട്ടെണ്ണൽ നാളെ, പ്രതീക്ഷയോടെ മുന്നണികൾ

തിരുവനന്തപുരം: തദ്ദേശ സ്​ഥാപനങ്ങളിലേക്ക്​ നടന്ന തെരഞ്ഞെടുപ്പി​ൽ വോ​ട്ടെണ്ണൽ ബുധനാഴ്​ച നടക്കും. ആദ്യ ഫല സൂചനകൾ രാവിലെ എട്ടരയോടെയും അന്തിമഫലം ഉച്ചയോടെയും അറിയാനാകും. വോ​ട്ടെടുപ്പിനെപ്പോലെ തന്നെ കോവിഡ്​ മാനദണ്ഡങ്ങൾ പാലിച്ചാകും വോ​ട്ടെണ്ണല​ും.

പോസ്​റ്റൽ വോട്ടുകളാണ്​ ആദ്യം എണ്ണുക. രണ്ടരലക്ഷത്തോളം പോസ്​റ്റൽ വോട്ടുകളാണ്​ ഇത്തവണ രേഖപ്പെടുത്തിയത്​. സർവിസ്​ വോട്ടുകൾ കൂടാതെ കോവിഡ്​ ബാധിതർക്കായി ഏർപ്പെടുത്തിയ ​പ്രത്യേക തപാൽ വോട്ടുകളും ഇത്തവണയുണ്ട്​.

ത്രിതല പഞ്ചായത്തുകളിലേത്​ ബ്ലോക്ക്​ തലത്തിലും മുനിസിപ്പാലിറ്റികളിലും കോർപറേഷനുകളിലും പോളിങ്​ സാമഗ്രികളുടെ വിതരണം നടന്ന കേന്ദ്രങ്ങളിലുമാകും വോ​ട്ടെണ്ണൽ നടക്കുക.

കോവിഡ്​ ഭീതിക്കിടയിലും വോട്ടിങ് ശതമാനം ഉയർന്നത്​ പ്രതീക്ഷയോടെയാണ്​ മുന്നണികൾ നോക്കികാണുന്നത്​. ഉയർന്ന പോളിങ്​ ശതമാനം ആരെ തുണച്ചുവെന്ന്​ ബുധനാഴ്​ച ഉച്ചയോടെ അറിയാം.