ദ്രൗപതി മുർമുവിന് വോട്ട് മറിച്ച്​ ചെയ്തയാൾ കുലംകുത്തിയെന്ന് പന്ന്യൻ രവീന്ദ്രൻ

ആലപ്പുഴ: രാഷ്ട്രപതി തെരഞ്ഞെടുപ്പിൽ ദ്രൗപതി മുർമുവിന് കേരളത്തിൽ നിന്ന് വോട്ട്​ ചെയ്തയാൾ ആരായാലും കുലംകുത്തിയാണെന്ന്​ സി.പി.ഐ കേന്ദ്ര കൺട്രോൾ കമീഷൻ ചെയർമാൻ പന്ന്യൻ രവീന്ദ്രൻ. ആലപ്പുഴയിൽ മാധ്യമപ്രവർത്തകരോട്​ സംസാരിക്കുകയായിരുന്നു അദ്ദേഹം.

വോട്ടുചെയ്തത് ആരായാലും രാഷ്ട്രീയമറിയാത്തയാളാണ്. ജീവിക്കാനുള്ള രാഷ്ട്രീയ പ്രവർത്തനമാണ്​ അയാളുടേത്. അതാരാണെന്ന്​ കണ്ടുപിടിക്കണം. ഇത്തരത്തിൽ വോട്ട്​ ചെയ്തതിലൂടെ നാടിന്റെ ധാർമികതയെയാണ് ചോദ്യംചെയ്​തത്​. കേരളംപോലെ രാഷ്ട്രീയ പ്രബുദ്ധത ഉയർന്ന സംസ്ഥാനത്തുനിന്ന് ഇങ്ങനെ സംഭവിച്ചതിൽ വലിയ പ്രതിഷേധമുണ്ട്.

ആദിവാസി ഗോത്രവനിതയെ പിന്തുണക്കാത്ത ഇടത്​ സമീപനം ശരിയോയെന്ന ചോദ്യത്തിന് അങ്ങനെയെങ്കിൽ കേന്ദ്രം ഭരിക്കുന്നവർ മറ്റെല്ലാ പാർട്ടികളെയും വിളിച്ച് സമവായമാണ്​ ഉണ്ടാക്കേണ്ടിയിരുന്നുവെന്നായിരുന്നു മറുപടി. എ.പി.ജെ. അബ്​ദുൽ കലാമിന്‍റെ കാര്യത്തിൽ സമവായ ശ്രമമുണ്ടായിട്ടും ഇടതുപക്ഷം സ്ഥാനാർഥിയെ നിർത്തിയല്ലോയെന്ന ചോദ്യത്തിന് അതും ഇപ്പോഴത്തെ തെരഞ്ഞെടുപ്പും തമ്മിൽ കൂട്ടിക്കുഴക്കേണ്ടതില്ലെന്നും അദ്ദേഹം പറഞ്ഞു.