സിദ്ധൻെറ വാക്കു കേട്ട്​ നവജാത ശിശുവിന്​ മുലപ്പാൽ നിഷേധിച്ച മാതാവിന്​ ശിക്ഷ

കോഴിക്കോട്​: സിദ്ധൻെറ വാക്കുകേട്ട് നവജാത ശിശുവിന്​ മുലപ്പാൽ നിഷേധിച്ച സംഭവത്തിൽ മാതാവിനെ കോടതി ശിക്ഷിച്ചു. ഓമശേരി ചക്കാനകണ്ടി ഹഫ്​സത്തിനാണ് ജുവനൈൽ ജസ്​റ്റിസ്​ ആക്​ടിലെ 75, 87 വകുപ്പുകൾ പ്രകാരം​ 1000രൂപ പിഴക്കും കോടതി പിരിയുന്നതുവരെ കോടതിക്ക്​ മുമ്പിൽ നിൽക്കുന്നതിനും ശിക്ഷ വിധിച്ചത്​.

താമരശ്ശേരി ജുഡീഷ്യൽ ഫസ്​റ്റ്​ ക്ലാസ്​ കോടതിയാണ്​ ശിക്ഷിച്ചത്​. കേസിലെ ഒന്നാം പ്രതിയാണ്​ ഹഫ്​സത്ത്. കുട്ടിയുടെ പിതാവ്​ ഓമശേരി ചക്കാനകണ്ടി അബൂബക്കർ(31), കളൻതോട്​ സ്വദേശിയായ സിദ്ധൻ മുഷ്​താരി വളപ്പിൽ ഹൈദ്രോസ്​ തങ്ങൾ എന്നിവരെ കോടതി വെറുതെ വിട്ടു.

2016 നവംബറിലുണ്ടായ സംഭവത്തിലാണ്​ ഇപ്പോൾ ശിക്ഷ വിധിച്ചിരിക്കുന്നത്​. ജനിച്ച ശേഷം അഞ്ച്​ ബാങ്ക്​ വിളി കഴിയാതെ കു​ഞ്ഞിന്​ മുലപ്പാൽ നൽകരുതെന്ന സിദ്ധൻെറ നിർദേശമനുസരിച്ച്​ കുഞ്ഞിന്​ മുലപ്പാൽ നൽകാൻ വിസമ്മതിക്കുകയായിരുന്നു. ഹൈദ്രോസ്​ തങ്ങളുടെ നിർദേശമനുസരിച്ച്​ അഞ്ച്​ ബാങ്ക്​ വിളി കഴിഞ്ഞി​ട്ടേ മുലയൂട്ടാവൂ എന്ന്​ പിതാവ്​ ശഠിച്ചു. ഹഫ്​സത്തും ഈ നിലപാട്​ തന്നെ സ്വീകരിച്ചു.

മാതാപിതാക്കളുടെ നിലപാട്​ കുഞ്ഞിൻെറ ജീവ​ന്​ ഭീഷണിയായതോടെ കലക്​ടറും ബാലാവകാശ കമീഷനും വിഷയത്തിൽ ഇട​െപട്ടു. യുവതിയുടെ പ്രസവം നടന്ന മുക്കത്തെ​ ആശുപത്രിയിലെ നഴ്​സിൻെറ​ പരാതിയിലാണ്​ പൊലീസ്​ കേസെടു​ത്തത്​.