കൊലവിളി പ്രകടനത്തിനെതിരെ ഡി.വൈ.എഫ്.ഐയിൽ നടപടി; മേഖല സെക്രട്ടറിയെ ചുമതലയിൽനിന്ന്​ നീക്കി

എടക്കര (മലപ്പുറം): മൂത്തേടത്ത് കൊലവിളി മുദ്രാവാക്യവുമായി പ്രകടനത്തിന്​ നേതൃത്വം നൽകിയവർക്കെതിരെ ഡി.വൈ.എഫ്​​.ഐ നടപടിയെടുത്തു. മൂത്തേടം മേഖല സെക്രട്ടറി പി.കെ. ഷഫീഖിനെ സംഘടന ചുമതലകളിൽനിന്ന്​ നീക്കി. ഡി.വൈ.എഫ്​.ഐ ജില്ല കമ്മിറ്റിയാണ്​ നടപടിയെടുത്തത്​. ജൂൺ 18നായിരുന്നു സംഭവം. പ്രദേശത്തെ വാട്സ്​ആപ്​ കൂട്ടായ്മയിലെ ചര്‍ച്ചയില്‍ ഡി.വൈ.എഫ്.ഐ, യൂത്ത് കോണ്‍ഗ്രസ് പ്രവര്‍ത്തകര്‍ തമ്മിലുണ്ടായ വാക്​പോര് ഇക്കഴിഞ്ഞ 17ന്​ സംഘർഷത്തിൽ കലാശിച്ചിരുന്നു​. സംഭവത്തിൽ ഇരുവിഭാഗത്തിലെയും എട്ടുപേര്‍ക്കെതിരെ എടക്കര പൊലീസ് കേസെടുത്തു. തുടർന്ന്​ ഡി.വൈ.എഫ്.ഐ മൂത്തേടത്ത് നടത്തിയ പ്രകടനത്തിലാണ് വിവാദ മുദ്രാവാക്യമുയര്‍ന്നത്. അരിയില്‍ ഷുക്കൂറിനെ അരിഞ്ഞുവീഴ്ത്തിയ പൊന്നരിവാള്‍ അറബിക്കടലില്‍ എറിഞ്ഞിട്ടി​െല്ലന്നും തുരുമ്പ്​ എടുത്തിട്ടില്ലെന്നുമാണ്​ പ്രകടനത്തിൽ ഉയർന്ന മുദ്രാവാക്യം.

'അന്ന് വടക്കേ കണ്ണൂരില്‍, ഷുക്കൂറെന്നൊരു വേട്ടപ്പട്ടി, വല്ലാതങ്ങ് കുരച്ചപ്പോള്‍, അരിഞ്ഞുതള്ളിയ പൊന്നരിവാള്‍ അറബിക്കടലില്‍ എറിഞ്ഞിട്ടില്ല, തുരുമ്പെടുത്ത് പോയിട്ടില്ല, ഓര്‍ത്തോ ഓര്‍ത്തു കളിച്ചോളൂ...'' തുടങ്ങിയവയായിരുന്നു മുദ്രാവാക്യം. ഷുക്കൂറിനെ കൊന്നത് തങ്ങളാണെന്ന് പരസ്യമായി സമ്മതിക്കുന്നതാണ് പ്രകടനത്തിലെ മുദ്രാവാക്യമെന്ന്​ ചൂണ്ടിക്കാട്ടി കുറ്റക്കാര്‍ക്കെതിരെ നടപടി ആവശ്യപ്പെട്ട്​ മൂത്തേടം പഞ്ചായത്ത് മുസ്​ലിം യൂത്ത് ലീഗ് ജനറല്‍ സെക്രട്ടറി കെ. സഹീറലി എടക്കര പൊലീസില്‍ പരാതി നല്‍കിയിരുന്നു. ഇതി​​െൻറ അടിസ്​ഥാനത്തിൽ പൊലീസ്​ കേസെടുക്കുകയും ചെയ്​തു.

പ്രതിഷേധ പ്രകടനം നടത്തിയെന്നത് ശരിയാണെന്നും കൊലവിളി മുദ്രാവാക്യം ഉയര്‍ത്തുന്ന ശബ്​ദം കൃത്രിമമായി കയറ്റിയതാണെന്നുമായിരുന്നു സി.പി.എം മൂത്തേടം ലോക്കല്‍ സെക്രട്ടറി വി.കെ. ഷാനവാസ്, ഡി.വൈ.എഫ്.ഐ എടക്കര ബ്ലോക്ക്​ കമ്മിറ്റി അംഗം ഷബീബ് മനയില്‍ എന്നിവർ വാർത്താകുറിപ്പിൽ അറിയിച്ചത്​. പ്രദേശത്ത്​ കോൺഗ്രസും സി.പി.എമ്മും തമ്മിലാണ്​ പ്രശ്​നം​. അങ്ങനെയിരിക്കെ, ഷുക്കൂറിനെ പരാമർശിക്കേണ്ട ആവശ്യം തങ്ങൾക്കില്ലെന്നും ഇവർ വ്യക്​തമാക്കി.

അതേസമയം, പ്രതിഷേധ പ്രകടനത്തിലെ ​പ്രകോപന മുദ്രാവാക്യങ്ങളെ തള്ളിപ്പറഞ്ഞ് ഡി.വൈ.എഫ്​.ഐ​ ജില്ല കമ്മിറ്റി കഴിഞ്ഞദിവസം രം​ഗത്തെത്തിയിരുന്നു. പ്രാദേശിക വാട്സ്ആപ് ഗ്രൂപ്പിലുണ്ടായ വാക്കേറ്റത്തെ തുടർന്ന് പ്രവർത്തകൻ ചെറുവള്ളിക്കൽ അൻവറിനെ യൂത്ത്​ കോൺഗ്രസ്​ അംഗങ്ങൾ ആക്രമിച്ചിരുന്നുവെന്ന്​ ജില്ല കമ്മിറ്റി നൽകിയ വിശദീകരണത്തിൽ പറയുന്നു.

അടുത്തദിവസം​ മറ്റൊരു പ്രവർത്തകൻ പ്രിൻസിനുനേരെ വധ ഭീഷണിയുണ്ടായെന്നും ഇതേതുടർന്ന്​​ മൂത്തേടം ടൗണിൽ രാത്രി പ്രതിഷേധ പ്രകടനം നടത്തുകയും ചെയ്​തു. എന്നാൽ, പ്രകടനത്തിലെ ചില മുദ്രാവാക്യങ്ങൾ സംഘടനയുടെ നിലപാടിന് യോജിച്ചതല്ല. അത്തരം മുദ്രാവാക്യങ്ങളെ തള്ളിപ്പറയുന്നു. മുദ്രാവാക്യം വിളിച്ചവരിൽ ഉത്തരവാദപ്പെട്ട പ്രവർത്തകരുണ്ടോ എന്ന് പരിശോധിച്ച് ഉചിതമായ തീരുമാനം കൈക്കൊള്ളുമെന്നും ജില്ല സെക്ര​േട്ടറിയറ്റ് പ്രസ്താവനയിൽ അറിയിച്ചിരുന്നു. ഇതി​​െൻറ അടിസ്​ഥാനത്തിലാണ് മൂത്തേടം​ മേഖല സെക്രട്ടറിയെ തിങ്കളാഴ്​ച ചുമതലയിൽനിന്ന്​ നീക്കിയത്​.