പൊമ്പിളൈ ഒരുമൈ പ്രവർത്തകരെ പൊലീസ്​ അറസ്​റ്റ്​ ചെയ്​ത്​ നീക്കി

മൂന്നാർ: മന്ത്രി എം.എം. മണി രാജിവെക്കണമെന്ന്​ ആവശ്യപ്പെട്ട് നിരാഹാരസമരം നടത്തി വന്ന പൊമ്പിളൈ  ഒരുമൈ പ്രവർത്തകരെ പൊലീസ്​ അറസ്​റ്റ്​ ചെയ്​ത്​ അടിമാലി താലൂക്ക് ആശുപത്രിയിലേക്ക് മാറ്റി. ശനിയാഴ്​ച ഉച്ചയോടെയാണ്​ ശാരീരിക അസ്വസ്​ഥത അനുഭവപ്പെട്ട മൂവരെയും പൊലീസ്​ ബലപ്രയോഗത്തിലൂടെ നീക്കിയത്​. പ്രവർത്തകരെ നീക്കം ചെയ്യുന്നതുമായി ബന്ധപ്പെട്ട്​ സ്​ഥലത്ത്​ സംഘർഷാവസ്​ഥ ഉടലെടുത്തെങ്കിലും പൊലീസ്​ രംഗം ശാന്തമാക്കി. രാവിലെ പത്തോടെ ദേവികുളം കമ്യൂണിറ്റി ആരോഗ്യകേന്ദ്രത്തിലെ ഡോ. എം. ജിനു നിരാഹാരസമരക്കാരെ പരിശോധിച്ചിരുന്നു. ആരോഗ്യസ്​ഥിതി മോശമാണെന്ന്​ അറിയിച്ചതോടെയാണ്​ അറസ്​റ്റ്​​ ചെയ്ത്​ നീക്കാൻ ശ്രമം ആരംഭിച്ചത്.

മൂന്നാർ ഡിവൈ.എസ്​.പിയുടെയും വനിത എസ്​.ഐയുടെയും നേതൃത്വത്തിൽ സമരക്കാരോട് ആശുപത്രിയിലേക്ക് പോകാമെന്ന് പറഞ്ഞെങ്കിലും  കൂട്ടാക്കിയില്ല. തുടർന്ന്​ ബലപ്രയോഗത്തിലൂടെ പൊമ്പിളൈ ഒരുമൈ സെക്രട്ടറി രാജേശ്വരിയെയാണ് ആദ്യം ആശുപത്രിയിലേക്ക് മാറ്റിയത്. ഉച്ചയോടെ  പന്തലിലെത്തിയ ദേവികുളം മെഡിക്കൽ ഓഫിസർ ഗോമതി, കൗസല്യ എന്നിവരെ പരിശോധിച്ച്  മെഡിക്കൽ റിപ്പോർട്ട് അധികൃതർക്ക് കൈമാറി. ആരോഗ്യനില വഷളായ ഇരുവരെയും ആശുപത്രിയിലേക്ക്​ മാറ്റാൻ ഡി.എം.ഒ പൊലീസിന്​ നിർദേശം നൽകുകയും ചെയ്തു. പൊലീസ്​ സ്​​ഥലത്തെത്തിയെങ്കിലും മണി രാജിവെക്കാതെ സമരം അവസാനിപ്പിക്കില്ലെന്ന് പ്രഖ്യാപിച്ച് ഇരുവരും സമരപ്പന്തലിൽ കിടന്നു. ഡ്രിപ് നൽകുന്നത് സംബന്ധിച്ച് ഗോമതിയോടും കൗസല്യയോടും  ചർച്ചനടത്തുന്നതിനിടെ പൊലീസ്​ ഇരുവരെയും നാടകീയമായി ആംബുലൻസിലേക്ക്​ ബലംപ്രയോഗിച്ച്​ കൊണ്ടുപോവുകയായിരുന്നു.

ഗോമതിയും കൗസല്യയും വാഹനത്തിൽനിന്ന്​ ചാടാൻ ശ്രമിച്ചെങ്കിലും പൊലീസ്​ ബലംപ്രയോഗിച്ചതോടെ  വിഫലമായി. ഒപ്പം സമരപ്പന്തലിലുണ്ടായിരുന്ന ആം ആദ്​മി പ്രവർത്തകരും പ്രതിഷേധവുമായി രംഗത്തെത്തി. മന്ത്രിയെ സംരക്ഷിക്കാൻ പൊലീസ്​ നടത്തുന്ന പ്രവർത്തനങ്ങൾ അവസാനിപ്പിക്കണമെന്ന് ആവശ്യപ്പെട്ട് പ്രവർത്തകർ എത്തിയത്​ സംഘർഷാവസ്​ഥ സൃഷ്​ടിച്ചു. ഇതിനിടെ, പൊമ്പിളൈ ഒരു​ൈമയുടെ സമരത്തിന് പിന്തുണയേകി കണ്ണൻ ദേവൻ കമ്പനിയിലെ ഒറ്റപ്പാറ ഡിവിഷനിൽ താമസിക്കുന്ന ശ്രീലത ചന്ദ്രൻ​ പന്തലിൽ എത്തി. പ്രവർത്തകരെ അറസ്​റ്റ്​ ചെയ്​ത്​ നീക്കിയതുമായി ബന്ധപ്പെട്ട്​ ഒരുമണിക്കൂറോളം മൂന്നാർ ടൗണിൽ സംഘർഷാവസ്​ഥ നിലനിന്നു.

 അടിമാലി താലൂക്ക്​ ആശുപത്രിയില്‍ പ്രവേശിപ്പിച്ച ഗോമതി പൊലീസ് ബലപ്രയോഗത്തിലൂടെ അറസ്​റ്റ്​ ചെയ്തതെന്നും തനിക്ക് ആരോഗ്യപ്രശ്‌നങ്ങള്‍ ഇല്ലെന്നും  അറിയിച്ചു. സമരം തകര്‍ക്കാന്‍ പൊലീസി​​െൻറ തന്ത്രമാണിതെന്നും ആശുപത്രിയിലും സമരം തുടരുമെന്നും ഗോമതി വ്യക്​തമാക്കി. ഡോക്​ടറുടെ നിർദേശപ്രകാരമാണ് ഗോമതിയെ അറസ്​റ്റ്​ ചെയ്തതെന്ന് പൊലീസ് പറഞ്ഞു. പൊമ്പിളൈ ഒരുമൈ സമരത്തിനെതിരെ വിവാദ പ്രസംഗം നടത്തിയ എം.എം. മണിക്കെതിരെ 23നാണ് ഗോമതിയുടെ നേതൃത്വത്തിൽ മൂന്നാർ ടൗണിൽ സമരം ആരംഭിച്ചത്. സംസ്​ഥാനത്തി​​െൻറ വിവിധ ഭാഗങ്ങളിൽനിന്നുള്ള രാഷ്​ട്രീയ പാർട്ടികളും സംഘടനകളും പൊമ്പിളൈ ഒരുമൈ നടത്തിയ സമരത്തിന് ഐക്യദാർഢ്യം പ്രഖ്യാപിച്ച് മൂന്നാറിലെത്തിയിരുന്നു.