പെരിയ ഇരട്ടക്കൊല: ഹരജിയിൽ വിശദീകരണം തേടി

കൊച്ചി: കാസർകോട് പെരിയയിൽ രണ്ട്​ യൂത്ത് കോൺഗ്രസ് പ്രവർത്തകരെ കൊലപ്പെടുത്തിയ കേസ്​ സി.ബി.ഐക്ക്​ വിടണമെന്ന ഹരജിയിൽ ഹൈകോടതി സർക്കാറി​​െൻറയും സി.ബി.ഐയുടെയും വിശദീകരണം തേടി. നിലവിലെ പൊലീസ് അന്വേഷണത്തിൽ വിശ്വാസമില്ലെന്ന​ും അന്വേഷണം സി.ബി.ഐക്ക്​ കൈമാറണമെന്നുമാവശ്യപ്പെട്ട്​ കൊല്ലപ്പെട്ട കൃപേഷി​െൻറ പിതാവ് കൃഷ്‌ണൻ, മാതാവ് ബാലാമണി, ശരത് ലാലി​െൻറ പിതാവ് സത്യ നാരായണൻ, മാതാവ് ലളിത എന്നിവർ നൽകിയ ഹരജിയിലാണ്​ കോടതി വിശദീകരണം തേടിയത്​.

അന്വേഷണം ശരിയായ ദിശയിലാണ് നടക്കുന്നതെന്നും പത്തു പ്രതികളുള്ള കേസിൽ ഒമ്പതു പേരെ അറസ്​റ്റ്​ ചെയ്തെന്നും ഒരാൾ വിദേശത്താണെന്നും ചൊവ്വാഴ്​ച കേസ്​ പരിഗണിക്കവേ സർക്കാർ കോടതിയെ അറിയിച്ചു. ഇത്​ സംബന്ധിച്ച രേഖാമൂലമുള്ള വിശദീകരണം പത്ത്​ ദിവസത്തിനകം നൽകാൻ കോടതി നിർദേശിച്ചു. എതിർകക്ഷിയായ സി.ബി.ഐയോടും നിലപാട്​ തേടി.

രാഷ്​ട്രീയ വൈരാഗ്യത്തെത്തുടർന്ന് സി.പി.എം പ്രവർത്തകരാണ്​ കൃപേഷിനെയും ശരത്തി​നെയും കൊലപ്പെടുത്തിയതെന്ന്​ ഹരജിക്കാർ ചൂണ്ടിക്കാട്ടി. അന്വേഷണം ക്രൈംബ്രാഞ്ച് എസ്.പി നേതൃത്വം നൽകുന്ന സംഘത്തിന് കൈമാറിയെങ്കിലും സി.പി.എം നേതാക്കൾക്കെതിരായി മൊഴി രേഖപ്പെടുത്തിയതിന്​ പിന്നാലെ അന്വേഷണ ഉദ്യോഗസ്​ഥനെ സ്​ഥലം മാറ്റിയത്​ അന്വേഷണം അട്ടിമറിക്കാനാണെന്ന്​ ഹരജിയിൽ പറയുന്നു.