തിരുവനന്തപുരം ലുലുമാൾ നിർമാണത്തിനെതിരായ ഹരജി തള്ളി

കൊച്ചി: തിരുവനന്തപുരം​ ലുലുമാളി​െൻറ നിര്‍മാണം തടയണമെന്ന പൊതുതാൽപര്യ ഹരജി ഹൈകോടതി തള്ളി. രേഖകളെല്ലാം പരിശോധിച്ചാണ് നിർമാണത്തിന്​ അനുമതി നല്‍കിയതെന്നാണ്​ ബോധ്യമാകുന്നതെന്നും തീരപരിപാലന ചട്ടം ലംഘിച്ചെന്ന ഹരജിക്കാര​െൻറ വാദങ്ങള്‍ക്ക്​ അടിസ്ഥാനമില്ലെന്നും വ്യക്തമാക്കിയാണ്​ കൊല്ലം സ്വദേശി കെ.എം. സലീം നൽകിയ ഹരജി ജസ്​റ്റിസ് എസ്.വി. ഭാട്ടി, ജസ്​റ്റിസ് ബെച്ചു കുര്യന്‍ തോമസ് എന്നിവരടങ്ങുന്ന ഡിവിഷന്‍ ബെഞ്ച് തള്ളിയത്.

ഒന്നര ലക്ഷം ചതുരശ്ര മീറ്ററിലധികം വലുപ്പമുള്ള നിർമാണങ്ങള്‍ക്ക് അനുമതി നല്‍കാന്‍ സംസ്ഥാന പരിസ്ഥിതി ആഘാത പഠന അതോറിറ്റിക്ക്​ (എസ്.ഇ.ഐ.എ.എ) അധികാരമില്ലെന്നിരിക്കെ 2.32 ലക്ഷം ചതുരശ്ര മീറ്റർ നിർമാണത്തിന്​​ അനുമതി നല്‍കിയത്​ തെറ്റാണെന്നായിരുന്നു ഹരജിക്കാര​െൻറ വാദം. എന്നാൽ, എല്ലാ രേഖകളും പരിശോധിച്ചാണ്​ അനുമതി നൽകിയതെന്ന്​ കേരള തീരപരിപാലന അതോറിറ്റി വ്യക്തമാക്കിയിട്ടുണ്ട്​.

തീര നിയന്ത്രണ മേഖല മൂന്നാം വിഭാഗത്തിൽ ഉള്‍പ്പെട്ട സ്ഥലത്താണ് പദ്ധതി വരുന്നതെങ്കിലും ആക്കുളം തടാകത്തില്‍നിന്ന് 100 മീറ്റര്‍ ദൂരത്തിലായതിനാല്‍ നിർമാണത്തിന് തടസ്സമില്ല. സമീപത്തെ പാര്‍വതി പുത്തനാര്‍ കനാലി​െൻറ വീതി 25 മീറ്ററില്‍ താഴെയായതിനാൽ തീരനിയന്ത്രണമേഖല വിജ്​ഞാപന പ്രകാരമുള്ള തടസ്സങ്ങള്‍ ബാധകമാകില്ല. എല്ലാ ജലസ്രോതസ്സുകളില്‍നിന്നും ഒരേ അകലം നിർമാണാനുമതിക്ക്​ വേണമെന്നത് ഹരജിക്കാര​െൻറ തെറ്റിദ്ധാരണയാണെന്നും കോടതി വ്യക്തമാക്കി.