പി. ശശിക്കും എ.ഡി.ജി.പി എം.ആർ അജിത് കുമാറിനുമെതിരെ അന്വേഷണം വേണമെന്ന് വിജിലന്‍സ് കോടതിയില്‍ ഹരജി

തിരുവനന്തപുരം: മുഖ്യമന്ത്രിയുടെ പൊളിറ്റിക്കൽ സെക്രട്ടറി പി. ശശിക്കും എ.ഡി.ജി.പി എം.ആർ അജിത് കുമാറിനുമെതിരെ അന്വേഷണം വേണമെന്ന് വിജിലന്‍സ് കോടതിയില്‍ ഹരജി. പി.വി. അന്‍വര്‍ എം.എൽ.എയുടെ വെളിപ്പെടുത്തലിന്റെ അടിസ്ഥാനത്തില്‍ ശശിക്കെതിരെ അന്വേഷണം വേണമെന്നാണ് പൊതുതാൽപര്യ ഹരജിയിലെ ആവശ്യം.

നെയ്യാറ്റിന്‍കര സ്വദേശി പി. നാഗരാജനാണ് ഹരജി നൽകിയത്. ഒക്ടോബര്‍ ഒന്നിന് വിശദീകരണം നല്‍കണമെന്ന് സര്‍ക്കാരിന് വിജിലന്‍സ് കോടതി നിര്‍ദേശം നല്‍കി.

അനധികൃത സ്വത്തു സമ്പാദനവുമായി ബന്ധപ്പെട്ട് രണ്ടുപേർക്കുമെതിരെ അന്വേഷണം വേണമെന്ന് ഹരജിയിൽ ആവശ്യപ്പെടുന്നു. എ.ഡി.ജി.പി എം.ആർ അജിത് കുമാറും പി.ശശിയും ചേർന്നാണ് നിയമവിരുദ്ധ പ്രവർത്തനങ്ങൾ നടത്തുന്നതായി അൻവർ ആരോപിച്ചിരുന്നു.