വാഹന കൈമാറ്റം​ ആധാറുമായി ബന്ധിപ്പിക്കണമെന്ന്​ ഹരജി: ഹൈകോടതി കേന്ദ്ര സർക്കാറിന്‍റെ വിശദീകരണം​ തേടി

കൊച്ചി: ഉടമപോലുമറിയാതെ വാഹനത്തിന്‍റെ ഉടമസ്ഥാവകാശം കൈമാറുന്നത്​ തടയാൻ കൈമാറ്റം ആധാറുമായി ബന്ധിപ്പിക്കണമെന്ന ആവശ്യത്തിൽ ഹൈകോടതി കേന്ദ്ര സർക്കാറിന്‍റെ വിശദീകരണം​ തേടി.

ബാങ്കിൽ ബാധ്യതയില്ലാത്ത വാഹനങ്ങളുടെ ഉടമസ്ഥത പരിവാഹൻ വെബ് സൈറ്റ് വഴി ഉടമസ്ഥൻ അറിയാതെ കൈമാറാൻ കഴിയുന്ന സാഹചര്യമടക്കം ചൂണ്ടിക്കാട്ടി നൽകിയ ഹരജിയിലാണ്​ ജസ്റ്റിസ്​ മുരളി പുരുഷോത്തമൻ ​എതിർ കക്ഷികളുടെ വിശദീകരണം തേടിയത്​. തന്‍റെ ഉടമസ്ഥതയിലുള്ള വാഹനം രേഖകളിൽ തന്‍റെ വ്യാജ ഒപ്പിട്ട് ഭർത്താവ് സ്വന്തം പേരിലേക്ക്​ മാറ്റിയെന്ന്​ ആരോപിച്ച് എറണാകുളം സ്വദേശിയായ യുവതി നൽകിയ ഹരജിയിലാണ് ഉടമസ്ഥത കൈമാറ്റം ആധാറുമായി ബന്ധിപ്പിക്കണമെന്ന ആവശ്യം ഉന്നയിച്ചിരിക്കുന്നത്​.

വാഹന കൈമാറ്റത്തിനുള്ള ഒരു രേഖയിലും താൻ ഒപ്പിട്ടിരുന്നില്ലെങ്കിലും ഭർത്താവ്​ വ്യാജ ഒപ്പിട്ട് നൽകിയ അപേക്ഷയെ തുടർന്ന്​ വാഹനത്തിന്‍റെ ഉടമസ്ഥത മാറിയെന്നാണ്​ ഹരജിയിൽ പറയുന്നത്​. ഇക്കാര്യം അറിഞ്ഞതിനെത്തുടർന്ന്​ പരാതി നൽകിയ​പ്പോൾ വാഹനം ബ്ലാക്ക് ലിസ്റ്റിൽപെടുത്തി. എന്നാൽ, മോട്ടോർ വാഹന വകുപ്പ്​ മറ്റ് നടപടികളൊന്നും ​സ്വീകരിക്കാതിരുന്നതോടെയാണ്​ കോടതിയെ സമീപിച്ചത്​. ഹരജിക്കാരിയുടെ വാഹനത്തിന്‍റെ ഉടമസ്ഥത മാറ്റം റദ്ദാക്കുക, വ്യാജരേഖകൾ ഹാജരാക്കി ഉടമസ്ഥത മാറ്റിയ ഭർത്താവിനെതിരെ നിയമപരമായ നടപടിക്ക്​ നിർദേശം നൽകുക തുടങ്ങിയ ആവശ്യങ്ങളും ഹരജിയിൽ ഉന്നയിച്ചിട്ടുണ്ട്​.