കോവിഡ്​ രണ്ടാം തരംഗ സാധ്യത തള്ളാനാവില്ലെന്ന്​ മുഖ്യമന്ത്രി

ചെറുതുരുത്തി (തൃശൂർ): പുന്നപ്ര-വയലാറിലെ സ്​മൃതി കുടീരത്തിൽ ബി​.ജെ.പി സ്ഥാനാർഥിയും കൂട്ടരും അതിക്രമിച്ച്​ കയറി പൂക്കൾ വലിച്ചെറിയുകയും മുദ്രാവാക്യം വിളിക്കുകയും ചെയ്​തത്​ തെരഞ്ഞെടുപ്പു കാലത്ത്​ സമാധാനന്തരീക്ഷം തകർക്കാനാണെന്ന്​ മുഖ്യമന്ത്രി പിണറായി വിജയൻ. പുന്നപ്ര ഉൾപ്പെടെയുള്ള രക്ഷസാക്ഷി സ്​മൃതി കുടീരങ്ങൾ കമ്യൂണിസ്​റ്റുകളുടെ വികാരമാണ്​. തെരഞ്ഞെടുപ്പ്​ കാലത്ത്​ ഇത്തരം ചെയ്​തികൾ പ്രകോപനം സൃഷ്​ടിച്ച്​ കമ്യൂണിസ്​റ്റുകളെ ഇളക്കിവിട്ട്​ സമാധാനം തകർക്കാനാണ്​. എന്നാൽ പുന്നപ്ര-വയലാറിൽ കമ്യൂണിസ്​റ്റുകൾ സംയമനം പാലിച്ചു. ഇനിയും ഇത്തരം പ്രകോപനത്തിന്​ സാധ്യതയുണ്ടെന്ന സൂചനയാണിതെന്നും ജാഗ്രത പാലിക്കേണ്ടതെന്നും മുഖ്യമന്ത്രി പറഞ്ഞു. തെരഞ്ഞെടുപ്പ്​ പ്രചാരണത്തി​െൻറ ഭാഗമായി തൃശൂർ ജില്ലയിലെത്തിയ പിണറായി ചെറുതുരുത്തിയിൽ വാർത്തസമ്മേളനത്തിൽ സംസാരിക്കുകയായിരുന്നു.

എൽ.ഡി.എഫ്​ മറ്റ്​ ചിലരെപ്പോലെ കബളിപ്പിക്കാനല്ല പ്രകടന പത്രിക ഇറക്കുന്നത്​. പറയുന്നത്​ നടപ്പാക്കും, നടപ്പാക്കാനാവുന്നതേ പറയൂ. സാമൂഹ്യ നീതിയിൽ അധിഷ്​ഠിതമായ സർവതല സ്​പർശിയായ വികസനമാണ്​ മുന്നണി ലക്ഷ്യമിടുന്നത്​. സംസ്ഥാനത്ത്​ പരമ ദരി​ദ്രാവസ്ഥയിലുള്ള കുടുംബങ്ങളെ അതിൽനിന്നും മോചിപ്പിക്കാൻ മൈക്രോ പ്ലാൻ തയാറാക്കും. പ്രകടന പത്രികയിലെ ചില പദ്ധതികൾ മുഖ്യമന്ത്രി വിശദീകരിച്ചു.

കർണാടകം, തമിഴ്​നാട്​ തുടങ്ങിയ അയൽ സംസഥാനങ്ങളിൽ ​കോവിഡ്​ വീണ്ടും രൂക്ഷമാവുകയും രണ്ടാം തരംഗ സാധ്യത ഉയരുകയും ചെയ്​തിട്ടുണ്ട്​. കേരളത്തിൽ വ്യാപനം കുറഞ്ഞിട്ടുണ്ടെങ്കിലും അയൽ സംസ്ഥാനങ്ങളിലെ സാഹചര്യം ജാഗ്രത ആവശ്യപ്പെടുന്നുണ്ട്​. ​ഇവിടെയും രണ്ടാം തരംഗ സാധ്യത തള്ളാനാവില്ല. അതിന്​ മുമ്പ്​ പരമാവധി പേർക്ക്​ കോവിഡ്​ വാക്​സിൻ നൽകാനാണ്​ ശ്രമം. വാക്​സിനേഷനിൽ കേരളം നല്ലപ്രകടനമാണ്​ കാഴ്​ച വെക്കുന്നത്​. തലപ്പാടി ചെക്ക്​പോസ്​റ്റിൽ വാഹനങ്ങൾ തടയുന്ന കർണാടക നടപടി പരിഭ്രാന്തിയിൽനിന്ന്​ ഉണ്ടാവുന്നതാണെങ്കിലും അത്​ പാടില്ലാത്തതാണ്​. ഇക്കാര്യത്തിൽ വേണ്ടിവന്നാൽ ഇനിയും ബന്ധപ്പെട്ടവരുമായി സംസാരിക്കും.

ശബരിമല വിഷയത്തിൽ സി.പി.ഐ സംസ്ഥാന സെക്രട്ടറി കാനം രാജേന്ദ്രൻ നടത്തിയ പരാമർശത്തെ മുഖ്യമന്ത്രി ന്യായീകരിച്ചു. എൻ.എസ്​.എസിനെ വിമർശിച്ച കാനം പ്രകോപനപരമായി ഒന്നും പറഞ്ഞിട്ടില്ലെന്ന്​ അദ്ദേഹം പറഞ്ഞു. 'ഓരോരുത്തർ ഓരോ പരിപാടിയുമായി ​പോകുകയാണ്​' എന്നും മുഖ്യമന്ത്രി പറഞ്ഞു. വിവിധ സർവേ റിപ്പോർട്ടുകൾ എൽ.ഡി.എഫിന്​ മേൽക്കെ​ പ്രവചിക്കുന്നതിനെപ്പറ്റിയുള്ള ചോദ്യത്തിന്​ 'എന്ത്​ ചെയ്യാം, നാട്ടിലെ അവസ്ഥ അങ്ങനെയാണ്​' എന്നായിരുന്നു മുഖ്യമന്ത്രിയുടെ മറുപടി.