സ്വാഗത പ്രസംഗം നീണ്ടു; അസ്വസ്ഥനായ മുഖ്യമന്ത്രി വേദിവിട്ടു

കൊല്ലം: നീണ്ടുപോയ സ്വാഗതപ്രസംഗം നിര്‍ത്തിപ്പിച്ച് ഭദ്രദീപം തെളിച്ച്​ മുഖ്യമന്ത്രി സംസാരിക്കാതെ വേദി വിട്ടു. ജില്ല ആശുപത്രിയിലെ പദ്ധതികളുടെ ഉദ്ഘാടന ചടങ്ങിനിടെയായിരുന്നു സംഭവം.

ജില്ല പഞ്ചായത്ത് പ്രസിഡൻറ്​ സി. രാധാമണി സ്വാഗത പ്രസംഗത്തിനിടെ നോട്ടീസിലുള്ള 40 ഓളം പേര്‍ക്കും പേരെടുത്ത് സ്വാഗതം പറഞ്ഞതാണ് മുഖ്യമന്ത്രി പിണറായി വിജയനെ ചൊടിപ്പിച്ചത്. നീണ്ടുപോയ സ്വാഗത പ്രസംഗം ഇടക്ക്​ നിര്‍ത്തിപ്പിച്ച് ഭദ്രദീപം തെളിച്ച്​ മുഖ്യമന്ത്രി വേദി വിടുകയായിരുന്നു.

മുഖ്യമന്ത്രി അസ്വസ്ഥനായതോടെ സ്വാഗതപ്രസംഗം അവസാനിപ്പിക്കാന്‍ അധ്യക്ഷയായ മന്ത്രി കെ.കെ. ശൈലജ അടുത്തുവന്ന് പറഞ്ഞെങ്കിലും ജില്ല പഞ്ചായത്ത്​ പ്രസിഡൻറ്​ ഗൗനിച്ചില്ല. തുടർന്നാണ്​ പ്രസംഗം മതിയെന്ന് അറിയിച്ച് മുഖ്യമന്ത്രി ഭദ്രദീപം തെളിച്ച് പദ്ധതികൾ ഒൗദ്യോഗികമായി ഉദ്ഘാടനം ചെയ്​തത്​. തുടര്‍ന്ന് അടുത്ത യോഗസ്ഥലത്തേക്ക്​ തിരിക്കുകയും ചെയ്​തു.

തൊണ്ടക്ക് അസ്വസ്ഥത ഉള്ളതിനാലാണ് മുഖ്യമന്ത്രി സംസാരിക്കാതെ മടങ്ങിയതെന്ന് അധ്യക്ഷ പ്രസംഗം നടത്തിയ മന്ത്രി കെ.കെ. ശൈലജ പറഞ്ഞു. മുഖ്യമന്ത്രിയുടെ പ്രസംഗം കേൾക്കാൻ രോഗികളും കൂട്ടിരിപ്പുകാരുമടക്കം നിരവധി പേരാണ് കാത്തിരുന്നത്. ജില്ല ആശുപത്രിയിലെ ചടങ്ങിനു​ശേഷം ജില്ലയില്‍ മുഖ്യമന്ത്രിക്ക് നാല്​ പരിപാടികൾ കൂടി ഉണ്ടായിരുന്നു. അവിടങ്ങളിലെല്ലാം മുഖ്യമന്ത്രി എത്തിയെങ്കിലും പ്രസംഗിച്ചില്ല.