പ്രതിപക്ഷം പ്രതികാര പക്ഷമാകരുത്​ -മുഖ്യമന്ത്രി

കോഴിക്കോട്​: പ്രതിപക്ഷം പ്രതികാരപക്ഷമാകരുതെന്ന്​ മുഖ്യമന്ത്രി പിണറായി വിജയൻ. ഭക്ഷ്യ കിറ്റി​ന്‍റെ പേരിൽ തെരഞ്ഞെടുപ്പ് കമീഷനെ നുണപറഞ്ഞ്​ തെറ്റിദ്ധരിപ്പിച്ച്​ ജനങ്ങളുടെ അന്നം മുടക്കരുതെന്ന്​ പിണറായി വാർത്തസമ്മേളനത്തിൽ പറഞ്ഞു.

ജനങ്ങൾക്ക്​ നൽകുന്ന ഭക്ഷ്യകിറ്റുകൾ സൗജന്യമല്ല, അവരുടെ അവകാശമാണ്​. ഇത്തരം ഇടപെടലുകൾ സർക്കാർ ഇനിയും തുടരും. ഭക്ഷ്യക്കിറ്റ്​ വിതരണമൊക്കെ തെരഞ്ഞെടുപ്പ്​ പ്രഖ്യാപനത്തിന്​ എത്രയേ മുമ്പ്​ തീരുമാനമെടുത്തതാണ്​. ക്ഷേമ പെൻഷ​ന്‍റെ കാര്യത്തിലും പ്രതിപക്ഷ നേതാവ്​ നുണ പറയുകയാണെന്നും പിണറായി ആരോപിച്ചു​.

കോവിഡ്​, പ്രളയ കാലങ്ങളെ ജനം അതിജയിച്ചത്​ സർക്കാരി​െൻറ ഇത്തരം ഇടപെടലുകളിലൂടെയാണ്​. പറഞ്ഞു പറഞ്ഞ്​ ഇനി ശമ്പളവും നൽകാൻ പാടില്ലെന്ന്​ പ്രതിപക്ഷം പറയുമോ എന്നും മുഖ്യമന്ത്രി ചോദിച്ചു.

ആഘോഷങ്ങൾക്ക്​ മുമ്പായി കഴിഞ്ഞ വർഷങ്ങളിലും ഭക്ഷ്യ ധാന്യങ്ങൾ നൽകിയിട്ടുണ്ട്​. ഇത്​ പുതിയ കാര്യമല്ല. അടുത്ത ഭരണം കിട്ടിയാൽ പൊതുവിതരണ സംവിധാനം വിപുലപ്പെടുത്തും. എല്ലാ തദ്ദേശ സ്​ഥാപനങ്ങളിലും ജനകീയ ഹോട്ടലുകൾ സ്​ഥാപിക്കുമെന്നും പിണറായി കൂട്ടിച്ചേർത്തു.

പിണറായി ഇന്ന്​ കോഴിക്കോട്​ ജില്ലയിൽ തെരഞ്ഞെടുപ്പ് പ്രചാരണാർഥം അഞ്ച്​ പൊതുപരിപാടികളിൽ പ​ങ്കെടുക്കുന്നുണ്ട്​.