മുല്ലപ്പെരിയാർ ജല ബോംബാണെന്ന്​ എം.എം മണി മുഖ്യമന്ത്രിയെ ബോധ്യപ്പെടുത്തണം -പി.ജെ.ജോസഫ്​

മുല്ലപ്പെരിയാർ ജല ബോംബാണെന്ന് എം.എം.മണി പറഞ്ഞെങ്കിലും അത്​ മുഖ്യമന്ത്രിയെ ​അദ്ദേഹം ബോധ്യപ്പെടുത്തുകയാണ്​ വേണ്ടതെന്ന്​ പി.ജെ.ജോസഫ്​ എം.എൽ.എ. മുല്ലപ്പെരിയാർ വിഷയത്തിൽ സർക്കാർ യഥാർഥ്യ ബോധത്തോടെ പെരുമാറണമെന്നും അദ്ദേഹം പറഞ്ഞു.

ജനങ്ങളുടെ ജീവൻ ആപത്തിലാണ്. സർക്കാർ ഇത്​ ഗൗരവമായി എടുക്കണം. മുഖ്യമന്ത്രി മൗനം തുടരുന്നത് സങ്കടകരമെന്നും പി.ജെ.ജോസഫ് പറഞ്ഞു.

മുല്ലപ്പെരിയാർ ഡാം അപകടാവസ്ഥയിലാണെന്നാണ് എം.എം. മണി എംഎൽഎ കഴിഞ്ഞ ദിവസം പറഞ്ഞിരുന്നു . വണ്ടിപ്പെരിയാറിന് മുകളിൽ ജലബോംബായി മുല്ലപ്പെരിയാർ നിൽക്കുകയാണെന്നാണ്​ അദ്ദേഹം പറഞ്ഞത്​. ശർക്കരയും ചുണ്ണാമ്പും കൊണ്ട് പണിത അണക്കെട്ടിന്‍റെ അകം കാലിയാണെന്നും അദ്ദേഹം പറഞ്ഞിരുന്നു. മുല്ലപ്പെരിയാർ വിഷയത്തിൽ തമിഴ്നാട് രാഷ്ട്രീയം കളിക്കുകയാണെന്നും കേരളവും തമിഴ്നാടും ഒന്നിച്ചുനിന്നാലെ പരിഹാരം കണ്ടെത്താനാകൂ. ഡാം തകർന്നാൽ തമിഴ്​നാട്ടിലുള്ളവർ വെള്ളം കുടിക്കാതെയും നമ്മൾ വെള്ളം കുടിച്ചും മരിക്കുമെന്നും എം.എം മണി പറഞ്ഞിരുന്നു.