തടസ്സവാദം തള്ളി; നജീബ് കാന്തപുരത്തിനെതിരായ തെരഞ്ഞെടുപ്പ്​ ഹരജി നിലനിൽക്കുമെന്ന്​ ഹൈകോടതി

കൊച്ചി: പെരിന്തൽമണ്ണ എം.എൽ.എ നജീബ്​ കാന്തപുരത്തിനെതിരെ എതിർ സ്ഥാനാർഥി സമർപ്പിച്ച ഹരജി നിലനിൽക്കുമെന്ന്​ ഹൈകോടതി. നിയമസഭ മണ്ഡലത്തിലെ തെരഞ്ഞെടുപ്പ്​ റദ്ദാക്കണമെന്ന ഹരജിക്കെതിരെ നജീബ് കാന്തപുരം നൽകിയ തടസ്സവാദം ഹൈകോടതി തള്ളി. തപാൽ വോട്ടുകൾ എണ്ണിയിട്ടില്ലെന്ന ആരോപണത്തിൽ വിശദ പരിശോധന ആവശ്യമാണെന്നും തെരഞ്ഞെടുപ്പ്​ ഹരജിയിൽ വിചാരണ വേണ്ടതു​​ണ്ടെന്നും ​വ്യക്തമാക്കിയാണ്​ ഉത്തരവ്​.

മുസ്​ലിംലീഗ് സ്ഥാനാർഥിയായിരുന്ന നജീബിന്‍റെ തെരഞ്ഞെടുപ്പ് റദ്ദാക്കി തന്നെ വിജയിയായി പ്രഖ്യാപിക്കണമെന്ന്​ ആവശ്യപ്പെട്ട് ഇടത് സ്വതന്ത്ര സ്ഥാനാർഥി കെ.പി. മുഹമ്മദ് മുസ്തഫ നൽകിയ ഹരജിയിലെ തടസ്സവാദമാണ്​ ജസ്റ്റിസ്​ എ. ബദറുദ്ദീൻ തള്ളിയത്​. 348 തപാൽ വോട്ടുകൾ കാരണമില്ലാതെ എണ്ണാതിരുന്നെന്നും ഇതിൽ 300 വോട്ടെങ്കിലും തനിക്ക് കിട്ടുമായിരുന്നുവെന്നുമായിരുന്നു മുസ്തഫയുടെ ഹരജി​. ഇതുമായി ബന്ധപ്പെട്ട നടപടി ക്രമങ്ങൾ പാലിച്ചിട്ടില്ലെന്നും ഹരജിയിലുണ്ട്​.​ 38 വോട്ടിന്‍റെ ഭൂരിപക്ഷത്തിലാണ് നജീബ് വിജയിച്ചത്.

ശരിയായ രീതിയിലല്ലാത്തതും നിയമപരമായി നിലനിൽക്കാത്തതുമാണ്​ ഹരജിയെന്നായിരുന്നു എം.എൽ.എയുടെ തടസ്സവാദം. തെരഞ്ഞെടുപ്പ് ഹരജിക്ക്​ ആവശ്യമായ എല്ലാ വിവരങ്ങളും ഇതിലില്ല. ആവശ്യമായ നിബന്ധനകൾ പാലിക്കാത്ത തപാൽ വോട്ടുകൾ മാത്രമാണ്​ എണ്ണാതിരുന്നത്​. എല്ലാ നടപടിക്രമങ്ങളും ​പോൾ ഓഫിസർമാർ പാലിച്ചിട്ടുണ്ട്​. ഡിക്ലറേഷൻ പൂരിപ്പിച്ച്​ വോട്ടർ ഒപ്പിട്ട്​ നൽകേണ്ടതു​ണ്ട്​.

അത്​ ചെയ്യാതിരുന്നതിന്​ ഉദ്യോഗസ്ഥരെ പഴിച്ചിട്ട്​ കാര്യമില്ല. ഉദ്യോഗസ്ഥർക്കെതിരായ വാദം ശരിയെന്ന്​ സമ്മതിച്ചാലും തെരഞ്ഞെടുപ്പ്​ റദ്ദാക്കാൻ അത്​ കാരണമല്ല. മറ്റ്​ ആരോപണങ്ങൾ അടിസ്ഥാനരഹിതമാണെന്നും എം.എൽ.എ വാദിച്ചു. എന്നാൽ, വിജയിച്ചയാളുടെ തെരഞ്ഞെടുപ്പ്​ ക്രമക്കേട്​ ചൂണ്ടിക്കാട്ടി നൽകുന്ന ഹരജിയിലാണ്​ വിശദ വിവരങ്ങൾ നൽകേണ്ടതെന്ന്​ ഹരജിക്കാരൻ വാദിച്ചു. നടപടിക്രമങ്ങൾ പാലിക്കാതെ തപാൽ വോട്ടുകൾ തള്ളിയത്​ സംബന്ധിച്ചാണ്​ ഹരജി.

348 തപാൽ വോട്ടുകൾ കാരണമില്ലാതെ എണ്ണാതിരുന്നതാണ്​ പ്രധാന ആരോപണമെന്ന്​ വിലയിരുത്തിയ കോടതി ഈ വാദം ശരിവെച്ചു. നടപടിക്രമങ്ങൾ പാലിക്കാതെ ബാലറ്റുകൾ തള്ളിയെന്ന ആരോപണമുണ്ടെങ്കിൽ തെരഞ്ഞെടുപ്പ്​ കേസ്​ നിലനിൽക്കുമെന്ന്​ വ്യക്തമാക്കിയ കോടതി തുടർന്നാണ്​ തടസ്സവാദ ഹരജി തള്ളിയത്​. തെരഞ്ഞെടുപ്പ്​ ഹരജിയിൽ വാദം തുടരും.