പോക്സോ കേസില് നാളെ വിചാരണ തുടങ്ങാനിരിക്കെ വയോധികൻ തൂങ്ങിമരിച്ച നിലയിൽ; പരാതി പച്ചക്കള്ളമെന്ന് കുറിപ്പ്
text_fieldsപത്തനംതിട്ട: പോക്സോ കേസില് നാളെ വിചാരണ തുടങ്ങാനിരിക്കെ പ്രതിയായ വയോധികനെ തൂങ്ങിമരിച്ച നിലയില് കണ്ടെത്തി. അടൂര് പന്നിവിഴ സ്വദേശി പുത്തന്വീട്ടില് നാരായണന്കുട്ടിയാണ് (72) മരിച്ചത്. ബുധനാഴ്ച രാവിലെ വീടിന്റെ മുകള്നിലയില് തൂങ്ങിമരിച്ച നിലയില് കണ്ടെത്തുകയായിരുന്നു.
നാരായണന്കുട്ടി എഴുതിയതെന്ന് കരുതുന്ന ആത്മഹത്യാ കുറിപ്പ് പൊലീസ് കണ്ടെടുത്തിട്ടുണ്ട്. തനിക്കെതിരായ പോക്സോ പരാതി പച്ചക്കള്ളമാണെന്നും ശാരീരിക പ്രയാസങ്ങള് കൂടി അലട്ടുന്നതിനാല് ഇനി ജീവിച്ചിരിക്കില്ലെന്നുമാണ് കുറിപ്പിലുള്ളത്. കുറിപ്പ് പൊലീസ് പരിശോധിച്ചുവരികയാണ്.
2021ല് രജിസ്റ്റര് ചെയ്ത കേസിലെ ഒന്നാം പ്രതിയാണ് നാരായണന്കുട്ടി. ഈ കേസില് വ്യാഴാഴ്ച അടൂര് അതിവേഗ കോടതിയില് വിചാരണ തുടങ്ങാനിരിക്കുകയായിരുന്നു. വ്യാഴാഴ്ച കോടതിയില് ഹാജരാകണമെന്ന് കഴിഞ്ഞ ദിവസം അറിയിപ്പ് ലഭിച്ചത് മുതല് നാരായണൻകുട്ടി അസ്വസ്ഥനായിരുന്നെന്ന് ബന്ധുക്കള് പറഞ്ഞു. മൃതദേഹം അടൂര് താലൂക്ക് ആശുപത്രിയിൽ പോസ്റ്റ്മോര്ട്ടത്തിന് ശേഷം ബന്ധുക്കള്ക്ക് വിട്ടുകൊടുത്തു.
![Girl in a jacket](https://www.madhyamam.com/h-library/newslettericon.png)
Don't miss the exclusive news, Stay updated
Subscribe to our Newsletter
By subscribing you agree to our Terms & Conditions.