ഷിറിയയിൽ എട്ട് കടവുകളും ആറ് തോണികളും പൊലീസ് നശിപ്പിച്ചു

കുമ്പള: അനധികൃത മണല്‍ കടത്ത് നടത്തുന്നുവെന്നാരോപിച്ച് ഷിറിയ പുഴയുടെ തീരത്ത് ഒളയം പ്രദേശത്തെ എട്ട് കടവുകളും ആറ് തോണികളും പൊലീസ് നശിപ്പിച്ചു. കടവുകൾ കിളച്ചിടുകയും തോണികൾ പൊളിക്കുകയും ചെയ്തു. കാസര്‍കോട് ഡി.വൈ.എസ്.പി. പി.കെ സുധാകരന്‍, കുമ്പള എസ്.ഐ. വി.കെ. അനീഷ് എന്നിവരുടെ നേതൃത്വത്തിലാണ് നടപടി.

അനധികൃത കടവ് വ്യാപകമാണെന്ന പരാതിയെ തുടര്‍ന്ന് കഴിഞ്ഞയാഴ്ച പൊലീസ് പരിശോധന നടത്തി അഞ്ച് കടവുകള്‍ തകര്‍ത്തിരുന്നു. വീണ്ടും മണല്‍ കടത്ത് സജീവമായതിനെ തുടർന്ന് പൊലീസ് പരിശോധന നടത്തുകയായിരുന്നു. രാത്രി കാലങ്ങളില്‍ മണല്‍ കടത്തിന്റെ മറവില്‍ മയക്കുമരുന്ന് ഉപയോഗവും വര്‍ധിച്ചുവരുന്നതായി പൊലീസ് പറയുന്നു.