നോട്ടീസ് നൽകി വിളിച്ചു വരുത്താനുള്ള അധികാരം പൊലീസ്​ ആയുധമാക്കരുത്​ -ഹൈകോടതി

കൊച്ചി: കേസന്വേഷണത്തിന്‍റെ ഭാഗമായി സംശയമുള്ളവരെയും സാക്ഷികളെയും വിളിച്ചുവരുത്താൻ പൊലീസിനുള്ള അധികാരം ദുരുപയോഗം ചെയ്യാനാവില്ലെന്ന്​ ഹൈകോടതി. പൊലീസിന്‍റെ അധികാരം വ്യക്തികളെ ഉപദ്രവിക്കാനുള്ള ആയുധമായി മാറ്റാനുള്ളതല്ല​. പൊലീസിനുള്ള അധികാരം ദുർവിനിയോഗം ചെയ്യപ്പെടുന്നത്​ തടയാനും വകുപ്പുകളുമുണ്ടെന്ന്​ ജസ്റ്റിസ്​ കൗസർ എടപ്പഗത്ത്​ വ്യക്തമാക്കി.

അന്വേഷണത്തിലിരിക്കുന്ന കേസിലെ പ്രതിയുടെ അഭിഭാഷകന് നോട്ടീസ് നൽകിയ ഞാറക്കൽ പൊലീസ്​ സബ്​ ഇൻസ്​പെക്ട​ർക്കെതിരായ ഹരജി തീർപ്പാക്കിയുള്ള ഉത്തരവിലാണ്​ സിംഗിൾ ബെഞ്ചിന്‍റെ നിരീക്ഷണം. മാർച്ച് 20ന് ഹാജരാകാൻ ആവശ്യപ്പെട്ട് പൊലീസ് നോട്ടീസ് നൽകിയതിനെ തുടർന്ന്​ അഭിഭാഷകൻ കെ.കെ. അജികുമാർ നൽകിയ ഹരജിയാണ്​ കോടതി പരിഗണിച്ചത്​.

ഫോറിനേഴ്സ് ആക്ടിന്‍റെ ലംഘനമാരോപിച്ച് ഞാറക്കൽ പൊലീസ്​ അറസ്റ്റ്​ ചെയ്ത ബംഗാൾ സ്വദേശികളായ ദമ്പതികളുടെ അഭിഭാഷകനായ ഹരജിക്കാരനിൽനിന്ന്​ പ്രതികളുമായി നടത്തിയ ആശയവിനിമയത്തിന്‍റെ വിശദാംശങ്ങൾ ചോദിച്ചറിയാനാണ്​ പൊലീസ്​ നോട്ടീസ്​ നൽകിയത്​. എന്നാൽ, പൊലീസ് കസ്റ്റഡിയിൽ ഉപദ്രവിച്ചെന്ന്​ ആരോപിച്ച് പ്രതിയായ ഭർത്താവ് അഭിഭാഷകൻ മുഖേന മജിസ്ട്രേറ്റ് കോടതിയിൽ പരാതി നൽകിയതിന്‍റെ വിരോധത്തിലാണ്​ നോട്ടീസ്​ എന്നായിരുന്നു ഹരജിക്കാരന്‍റെ വാദം. തുടർന്ന്​ കഴിഞ്ഞദിവസം ഞാറക്കൽ എസ്.ഐ അഖിൽ വിജയകുമാറിനെ​ കോടതി നേരിട്ട്​ വിളിച്ചുവരുത്തിയിരുന്നു. നോട്ടീസ്​ പിൻവലിച്ചതായി ഉദ്യോഗസ്ഥൻ അറിയിക്കുകയും പകർപ്പ്​ കോടതിയിൽ ഹാജരാക്കുകയും ചെയ്തു.

പരാതികളു​ടെയോ വസ്തുതകളുടെയോ അടിസ്ഥാനത്തിൽ പ്രതികളെന്ന്​ സംശയിക്കുന്നവരെയോ സാക്ഷികളെയോ നോട്ടീസ്​ നൽകി വിളിച്ചുവരുത്താൻ​ പൊലീസിന്​ അധികാരമുണ്ടെന്ന്​​ കോടതി ചൂണ്ടിക്കാട്ടി. എന്നാൽ, പ്രതികളുമായി നടത്തിയ ആശയവിനിമയങ്ങളുടെയോ ഇടപാടുകളുടെയോ വിശദാംശങ്ങൾ അറിയാൻ പൊലീസിന്​ അഭിഭാഷകനെ നോട്ടീസ്​ അയച്ച്​ വിളിച്ചുവരുത്തി ചോദ്യം ചെയ്യാൻ അധികാരമില്ല. പ്രതിയുടെ അഭിഭാഷക​നെന്നാൽ കോടതിയിൽ പ്രതിയുടെ പ്രതിനിധിയായി ഹാജരാകുന്നയാളാണ്​. അവർ തമ്മിലുള്ള ആശയവിനിമയത്തിന്‍റെ വിശദാംശങ്ങൾ വെളിപ്പെടുത്തുന്നതിൽ നിന്ന്​ അഭിഭാഷകന്​ നിയമപരമായ പരിരക്ഷയുണ്ട്​​. ഇക്കാര്യങ്ങൾ പൊലീസിനോടുപോലും വെളിപ്പെടുത്താൻ ബാധ്യതയില്ല -കോടതി വ്യക്തമാക്കി.