സിദ്ദീഖ്​ കാപ്പനെതിരെ നീക്കമില്ലെന്ന്​ പൊലീസ്​; ആശങ്ക മാറാതെ കുടുംബം; അർധ രാത്രിയിൽ വീട്ടിൽ നടത്തിയ പരിശോധനയിൽ വ്യക്തതയില്ല

മലപ്പുറം: സിദ്ദീഖ്​ കാപ്പനെതിരെ അസ്വാഭാവിക നീക്കങ്ങളൊന്നുമുണ്ടായിട്ടില്ലെന്ന്​ പൊലീസ്​. പ്രത്യേക കേസുകളിലുൾപ്പെട്ടവരുടെ ലിസ്റ്റ്​ പ്രകാരമുള്ള അന്വേഷണം മാത്രമാണ്​ നടന്നതെന്നും ഒരു ദുരൂഹനീക്കവും ഉണ്ടായിട്ടില്ലെന്നുമാണ്​​ പൊലീസിൽനിന്നുള്ള വിശദീകരണം. സിദ്ദീഖ് കാപ്പന്‍റെ വീട്ടിൽ പൊലീസ് എത്തിയതിലും കാര്യങ്ങൾ അന്വേഷിച്ചതിലും ദുരൂഹമായി ഒന്നുമില്ലെന്നും സാധാരണ നടപടികളുടെ ഭാഗം മാത്രമാണെന്നും വേങ്ങര പൊലീസ് ഇൻസ്​പെക്​ടർ രാജേന്ദ്രൻ നായർ പറഞ്ഞു. അതേസമയം, അർധരാത്രിയിൽ നടന്ന അന്വേഷണത്തിൽ പൊലീസ് വ്യക്തത വരുത്താൻ തയാറായില്ലെന്നാണ് കുടുംബവും സിദ്ദീഖ്​ കാപ്പന്‍റെ അഭിഭാഷകനും പറഞ്ഞത്​. പൊലീസിന്‍റെ അസാധാരണ നീക്കത്തിൽ കുടുംബം ആശങ്കയിലാണെന്ന്​ സിദ്ദീഖ്​ കാപ്പന്‍റെ ഭാര്യ റൈഹാന സിദ്ദീഖ്​ പ്രതികരിച്ചു.

ശനിയാഴ്ച വൈകീട്ട് 6.30ഓടെയാണ്​​​ സിദ്ദീഖ്​ കാപ്പന്‍റെ വീട്ടിൽ രണ്ടു​ പൊലീസുകാരെത്തിയതെന്നാണ്​​ കുടുംബം പറയുന്നത്​. രാത്രി 12 കഴിഞ്ഞ് വീട്ടിൽ സിദ്ദീഖ് കാപ്പൻ ഉണ്ടാകുമോ എന്ന് പൊലീസുകാർ ചോദിച്ചു. പരിശോധനക്കായി മലപ്പുറത്തുനിന്ന് അർധരാത്രി പൊലീസെത്തുമെന്നും വീട്ടിലേക്കുള്ള വഴിയും കാപ്പന്‍റെ സാന്നിധ്യവും ഉറപ്പുവരുത്താനാണ് മുൻകൂട്ടി ചോദിക്കുന്നതെന്നും ഉദ്യോഗസ്ഥർ പറഞ്ഞു.

എന്തിനാണ് പരിശോധനയെന്ന് ചോദിച്ചെങ്കിലും വ്യക്തമായ ഉത്തരമുണ്ടായില്ലെന്നും സിദ്ദീഖ്​ കാപ്പന്‍റെ ഭാര്യ പറഞ്ഞിരുന്നു. അതേസമയം, ശനിയാഴ്ച അർധരാത്രി പൊലീസുകാരാരും വീട്ടിൽ എത്തിയിട്ടില്ലെന്നും കുടുംബം അറിയിച്ചു​.