ആശുപത്രികൾക്കും ആരോഗ്യപ്രവർത്തകർക്കും നേരെയുള്ള അക്രമങ്ങൾ: പൊലീസ്​ ഉടൻ ഇടപെടണം - ഹൈകോടതി

കൊച്ചി: ആശുപത്രികൾക്കും ആരോഗ്യപ്രവർത്തകർക്കും നേരെയുള്ള അക്രമസംഭവങ്ങളിൽ പൊലീസ്​ ഉടൻ ഇടപെടണമെന്ന്​ ഹൈകോടതി. അക്രമത്തെക്കുറിച്ച്​ അറിവോ പരാതി​യോ ലഭിച്ചാൽ ഉടൻ പൊലീസ് സഹായവും നടപടികളും ലഭ്യമാക്കണമെന്ന് ജസ്​റ്റിസ് ദേവൻ രാമചന്ദ്രൻ, ജസ്​റ്റിസ് ഡോ. കൗസർ എടപ്പഗത്ത് എന്നിവരടങ്ങുന്ന ബെഞ്ച് നിർദേശിച്ചു.

ആശുപത്രികൾക്കും ​ആരോഗ്യപ്രവർത്തകർക്കുമെതി​രായ അക്രമം തടയുന്ന 2012ലെ കേരള ഹെൽത്ത്​ കെയർ സർവിസ്​ പേഴ്​സൻസ്​ ആൻഡ്​​ ഹെൽത്ത്​ കെയർ സർവിസസ്​ ഇൻസ്​റ്റിറ്റ്യൂഷൻസ്​ (പ്രിവൻഷൻ ​ഓഫ്​ വയലൻസ്​ ആൻഡ്​​ ഡാമേജ്​ ടു ​േ​പ്രാപ്പർട്ടി) ആക്​ട്​ സംബന്ധിച്ച്​ ജനത്തെ ബോധവത്​കരിക്കണം. പ്രതികൾക്കെതിരെ ജാമ്യമില്ല കുറ്റം ചേർത്ത്​ കേസെടുക്കാനാവുമെന്ന്​ ബോധ്യപ്പെടുത്തുന്ന വിധം ആക്​ടിലെ വിശദാംശങ്ങൾ ആശുപത്രി പരിസരങ്ങളിൽ പ്രദർശിപ്പിച്ചും മാധ്യമങ്ങൾ മ​ുഖേനയും പ്രചരിപ്പിക്കണം.

സ്വകാര്യ ആശുപത്രികളിലെ കോവിഡ് ചികിത്സ നിരക്ക് നിയന്ത്രിച്ച ഹൈകോടതി വിധി പുനഃപരിശോധിക്കണമെന്നാവശ്യപ്പെട്ട് കേരള പ്രൈവറ്റ് ഹോസ്പിറ്റൽസ് അസോസിയേഷൻ നൽകിയ ഹരജി പരിഗണിക്കവെയാണ് ഡിവിഷൻ ബെഞ്ച് ഇൗ നിർദേശങ്ങൾ നൽകിയത്​.

അതിക്രമങ്ങൾ അപ്പോൾതന്നെ അറിയിച്ചാൽ​പോലും പൊലീസിൽനിന്ന്​ നടപടിയുണ്ടാകാറില്ലെന്ന്​ വ്യാഴാഴ്​ച ഹരജി പരിഗണിക്കുന്നതിനിടെ ആശുപത്രി അധികൃതർ അറിയിച്ചു. ആശുപത്രികൾക്കെതിരെ സമൂഹ മാധ്യമങ്ങളിലൂടെ വ്യാജപ്രചാരണവും പതിവാണ്​. ഇതിനെതിരെയും നടപടി വേണം. സമാന ആരോപണം ഐ.എം.എയും ഉന്നയിച്ചു. തുടർന്നാണ്​ പൊലീസിന്​ കോടതി നിർദേശങ്ങൾ നൽകിയത്​. രണ്ടാഴ്​ചക്കുശേഷം ഹരജി വീണ്ടും പരിഗണിക്കാൻ മാറ്റി.

അതേസമയം, ആശുപത്രികളിലെത്തുന്നവർ വനിത ഡോക്ടർമാരെയും ജീവനക്കാരെയുംപോലും ആക്രമിച്ച സംഭവങ്ങളുടെ പശ്ചാത്തലത്തിൽ കടുത്ത നടപടികളെടുക്കുന്നുണ്ടെന്ന്​ വ്യക്തമാക്കി ക്രമസമാധാന ചുമതലയുള്ള ഡി.ജി.പി​ വിശദീകരണപത്രിക നൽകി. ആഗസ്​റ്റ്​ 26ന്​ കോടതി പുറപ്പെടുവിച്ച ഉത്തരവിനെത്തുടർന്ന്​ എല്ലാ ജില്ല പൊലീസ്​ മേധാവികൾക്കും അടിയന്തര നിർദേശം നൽകിയതായി വിശദീകരണത്തിൽ പറയുന്നു.