തെറ്റ്​ ചെയ്തവര്‍ ഐ.പി.എസുകാരാണെങ്കിലും പുറത്തുപോകും -മന്ത്രി സുധാകരൻ

അമ്പലപ്പുഴ: തെറ്റുചെയ്തവര്‍ ഐ.പി.എസുകാരാണെങ്കിലും അവര്‍ വെളിയില്‍ പോകുമെന്ന് മന്ത്രി ജി. സുധാകരന്‍. സിവിൽ പൊലീസ് ഓഫിസറായിരിക്കെ മരിച്ച ജോസഫി​​​െൻറ കുടുംബസഹായനിധി കൈമാറി സംസാരിക്കുകയായിരുന്നു അദ്ദേഹം.

മാപ്പര്‍ഹിക്കാത്ത തെറ്റുചെയ്തവരെ സര്‍വിസില്‍നിന്ന്​ പുറത്താക്കും. അറസ്​റ്റ്​ ചെയ്യുന്നയാളെ തൊടാനോ തല്ലാനോയുള്ള അധികാരം പൊലീസിനില്ല. വരാപ്പുഴയില്‍ അത്​ ലംഘിക്കപ്പെട്ടു. സര്‍ക്കാറി​​​െൻറ നിലപാടിന് വിരുദ്ധമായാണ് അവര്‍ പ്രവര്‍ത്തിച്ചത്. സര്‍ക്കാര്‍ സര്‍വിസില്‍ ഒരിക്കല്‍ കയറിയാല്‍ ആയുഷ്‌ക്കാലം മുഴുവനിരിക്കാമെന്ന് ആരും കരുതേണ്ട. അവര്‍ സര്‍വിസില്‍നിന്ന് വെളിയില്‍ പോകണം. 

പൊലീസുകാരുടെ മോശം ചെയ്തികളെ തുറന്നുകാണിക്കേണ്ടതിന്​ പകരം അത് സര്‍ക്കാര്‍ നയമാണെന്ന് പറയുകയാണ് ഒരുവിഭാഗം മാധ്യമങ്ങള്‍ ചെയ്യുന്നത്. കരുണാകരന്‍ മനസ്സിൽ കണ്ടപ്പോള്‍ ജയറാം പടിക്കല്‍ മാനത്തുകണ്ടതാണ് രാജൻ കൊലക്കേസ്. ചുമ്മാതെ കുത്തിയിരുന്ന്​ വിമര്‍ശിക്കുന്നവരുടെ വിമര്‍ശനത്തിന് പുല്ലുവില കല്‍പിക്കില്ല. ശരിചെയ്യുന്ന സര്‍ക്കാറിനെ പ്രതിക്കൂട്ടിലാക്കുകയാണ് ചില മാധ്യമങ്ങള്‍ -മന്ത്രി പറഞ്ഞു.