കാഞ്ഞങ്ങാട്ട് 67 ലക്ഷത്തിന്റെ കുഴൽപണം പിടികൂടി

കാഞ്ഞങ്ങാട്: ജില്ല പൊലീസ് മേധാവി ഡോ. വൈഭവ് സക്സേനയുടെ നേതൃത്വത്തിൽ നടപ്പാക്കി വരുന്ന ഓപറേഷൻ ക്ലീൻ കാസർകോട് രണ്ടാം ഘട്ടത്തിന്റെ ഭാഗമായി നടത്തിയ പരിശോധനയിൽ വൻ കുഴൽപണം പിടികൂടി.

കാഞ്ഞങ്ങാട് ഡിവൈ.എസ്.പി പി. ബാലകൃഷ്ണൻ നായരുടെയും ഇൻസ്‌പെക്ടർ കെ.പി. ഷൈനിന്റെയും നേതൃത്വത്തിൽ വെള്ളിയാഴ്ച രാവിലെ കല്ലുരാവിയിൽ നടത്തിയ പരിശോധനയിലാണ് സ്കൂട്ടറിൽ കൊണ്ടുപോകുകയായിരുന്ന 67 ലക്ഷം രൂപ പിടികൂടിയത്. സംഭവത്തിൽ പുഞ്ചാവി നാലുപുരപ്പാട്ടിൽ ഹാരിസിനെ (39) അറസ്റ്റ് ചെയ്തു. പൊലീസ് സംഘത്തിൽ സി.പി.ഒമാരായ ജ്യോതിഷ്, മനു എന്നിവരും ഉണ്ടായിരുന്നു.