മുഖ്യമന്ത്രിയുടെ പൊളിറ്റിക്കൽ സെക്രട്ടറി പി.ശശി പുറത്തേക്ക് ?

തിരുവനന്തപുരം: പി.വി. അൻവറിന്റെ ​വെളിപ്പെടുത്തലിനെതുടർന്ന് കലുഷിതമായ സംസ്ഥാന രാഷ്ട്രീയത്തിൽ മുഖ്യമന്ത്രിയുടെ ആരോപണ വിധേയനായ പൊളിറ്റിക്കൽ സെക്രട്ടറി പി.ശശിക്കെതിരെ നടപടി ഉണ്ടാകുമെന്ന് സൂചന.

സംഭവത്തിൽ മുഖ്യമന്ത്രിയുടെ വിശ്വസ്തനായ പി.ശശിയോടൊപ്പം ആരോപണ വിധേയരായ എ.ഡി.ജി.പി. അജിത്കുമാറിനെതിരെ അന്വേഷണവും പത്തനംതിട്ട എസ്.പി. എസ്. സുജിത് ദാസിനെ സസ്​പെൻഡ് ചെയ്യുകയും ചെയ്തിരുന്നു. ഈ സാഹചര്യത്തിൽ അടുത്ത നീക്കം പൊളിറ്റിക്കൽ സെക്രട്ടറിയായ പി.ശശിക്കെതിരായിരിക്കുമെന്ന കാര്യം ഏതാണ്ട് ഉറപ്പാണെന്ന് പാർട്ടിയുമായി അടുത്ത വൃത്തങ്ങൾ സൂചിപ്പിക്കുന്നു.

പ്രകാശ് ജാവദേക്കറുമായുള്ള കൂടിക്കാഴ്ചയിൽ ഇ.പി. ജയരാജനെ എൽ.ഡി.എഫ് കൺവീനർ സ്ഥാനത്തു നിന്നും പുറത്താക്കിയതിനു പിന്നാലെ വന്ന അൻവറിന്റെ വെളി​പ്പെടുത്തൽ സി.പി.എമ്മിനെ അക്ഷരാർഥത്തിൽ വെട്ടിലാക്കിയിരിക്കുകയാണ്.

നേരത്തേ അച്ചടക്ക നടപടി നേരിട്ട ശശിക്കെതിരെ പാർട്ടിയിൽ ഒരു വിഭാഗം നീക്കം നടത്തുന്നതായും സൂചനയുണ്ട്. പി.ശശിയും എ.ഡി.ജി.പി. അജിത്കുമാറും മറ്റും ചേർന്ന അധികാരകേന്ദ്രങ്ങളാണ് സംസ്ഥാന ഭരണം നിയന്ത്രിക്കുന്നതെന്ന രീതിയിലാണ് അൻവർ വെളിപ്പെടുത്തൽ നടത്തിയത്.