ലവ്​ ജിഹാദ് ആരോപണം: മുഖ്യമന്ത്രി വര്‍ഗീയതക്ക്​ കൂട്ടുനില്‍ക്കുന്നു -പോപുലര്‍ ഫ്രണ്ട്

കാസർകോട്​: ലവ്​ ജിഹാദ് ആരോപണത്തില്‍ നിലപാട് വ്യക്തമാക്കാന്‍ എല്‍.ഡി.എഫും മുഖ്യമന്ത്രി പിണറായി വിജയനും തയാറാവണമെന്ന് പോപുലര്‍ ഫ്രണ്ട് ഓഫ് ഇന്ത്യ സംസ്ഥാന പ്രസിഡൻറ്​ സി.പി. മുഹമ്മദ് ബഷീര്‍ ആവശ്യപ്പെട്ടു. സവര്‍ണ, ക്രൈസ്തവ വിഭാഗങ്ങള്‍ക്കിടയില്‍ വര്‍ഗീയതപറഞ്ഞ് വോട്ടുതേടുകയെന്ന സംഘ്​പരിവാര്‍ തന്ത്രമാണ് ജോസ് കെ. മാണിയും മാതൃകയാക്കുന്നത്.

കോടതികളും അന്വേഷണ ഏജന്‍സികളും തള്ളിക്കളഞ്ഞ ലവ്​ ജിഹാദ് വിഷയം കേരളത്തില്‍ ഉയര്‍ത്തിക്കൊണ്ടുവന്ന് വര്‍ഗീയ ധ്രുവീകരണത്തിലൂടെ മുതലെടുപ്പ് നടത്താനുള്ള ഗൂഢനീക്കത്തെ മതേതര ജനാധിപത്യ വിശ്വാസികള്‍ ചെറുത്തുതോല്‍പിക്കണം. കഴിഞ്ഞ ഒമ്പത് വര്‍ഷത്തെ സര്‍ക്കാര്‍ ഗസറ്റ് കണക്കുകള്‍ പ്രകാരം ഏറ്റവും കൂടുതല്‍ മതംമാറ്റം നടന്നത് ക്രിസ്ത്യന്‍ വിഭാഗത്തില്‍നിന്ന്​ ഹിന്ദുമതത്തിലേക്കാണ്. ക്രിസ്ത്യന്‍ വിഭാഗത്തില്‍നിന്ന്​ ഹിന്ദുമതത്തിലേക്ക് മതംമാറിയവര്‍ 5741 പേരാണ്.

അതേസമയം, ഇസ്​ലാം മതത്തിലേക്ക് മാറിയവര്‍ 535 പേര്‍ മാത്രമാണ്. ഹിന്ദുസമുദായത്തില്‍നിന്ന്​ ക്രിസ്ത്യന്‍ വിഭാഗത്തിലേക്ക് മാറിയത് 1811 പേരാണ്. രണ്ടു മതങ്ങള്‍ക്കിടയില്‍ സംഘര്‍ഷത്തിന് വഴിവെക്കുന്നവിധം ജോസ് കെ. മാണി നടത്തിയ പ്രസ്താവന സംബന്ധിച്ച നിലപാട് വ്യക്തമാക്കാന്‍ എൽ.ഡി.എഫ് നേതൃത്വം തയാറാവണമെന്നും അദ്ദേഹം പ്രസ്താവനയില്‍ ആവശ്യപ്പെട്ടു.