'മുരളീധരനെ വിളിക്കൂ, കോൺഗ്രസിനെ രക്ഷിക്കൂ'; തൃശൂരിൽ നേതൃത്വത്തിനെതിരെ​ പോസ്റ്റർ

തൃശൂർ: തദ്ദേശതെ​രഞ്ഞെടുപ്പിൽ കോൺഗ്രസിനേറ്റ പരാജയത്തിൽ നേതൃത്വത്തിനെതിരെ വിമർശനം. അതേസമയം കെ. മുരളീധരനെയും കെ. സുധാകരനെയും അനുകൂലിച്ചും നിരവധി നേതാക്കളെ എതിർത്തും തിരുവനന്തപുരത്തും തൃശൂരും കോഴിക്കോടും ഉൾപ്പെടെ പോസ്റ്ററുകൾ പ്രത്യക്ഷപ്പെട്ടു.

തൃശൂർ നഗരത്തിൽ കെ. മുരളീധരനെ അനുകൂലിച്ചാണ്​​ പോസ്റ്ററുകൾ ഒട്ടിച്ചിരിക്കുന്നത്​. 'മുരളീധരനെ വിളിക്കൂ... കോൺഗ്രസിനെ രക്ഷിക്കൂ' എന്നാണ്​ പോസ്റ്ററിലെ ഉള്ളടക്കം. യൂത്ത്​ കോൺഗ്രസിന്‍റെയും ​കെ.എസ്​.യുവിന്‍റെയും പേരിലാണ്​ പോസ്റ്ററുകൾ.

കൊല്ലത്ത്​ കഴ​ിഞ്ഞദിവസം ഡി.സി.സി പ്രസിഡന്‍റ്​ ബിന്ദു കൃഷ്​ണക്കെതിരായി പോസ്റ്ററുകൾ പതിച്ചിരുന്നു. ഡി.സി.സി, ആർ.എസ്​.പി ഓഫിസിന്​ മുമ്പിലാണ്​ പോസ്​റ്ററുകൾ ഉയർന്നത്​. സേവ്​ കോൺഗ്രസ്​ എന്ന പേരിലായിരുന്നു പോസ്റ്റർ. ബിന്ദു കൃഷ്​ണ സ്​ഥാനാർഥി നിർണയത്തിൽ പണം വാങ്ങിയെന്നും അവരെ പുറത്താക്കണമെന്നുമാണ്​ പോസ്റ്ററിലെ ആവശ്യം.

കെ. സുധാകരനെ വിളിക്കൂ... കോൺഗ്രസിനെ രക്ഷിക്കൂ എന്നാവശ്യപ്പെട്ടുള്ള ഫ്ലക്​സുകളും കെ.പി.സി.സി ആസ്​ഥാനത്ത്​ പ്രത്യക്ഷപ്പെട്ടിരുന്നു. കെ. സുധാകരനെ കെ.പി.സി.സി പ്രസിഡന്‍റാക്കണമെന്നാണ്​ ആവശ്യം.

അതേസമയം നിയമസഭ തെരഞ്ഞെടുപ്പിന്​ മുമ്പ്​ നേതൃമാറ്റം വേണ്ടെന്ന നിലപാടിലാണ്​ കോൺഗ്രസ്​ ഹൈക്കമാൻഡ്​. നേതാക്കളുടെ പരസ്യ പ്രസ്താവനയിൽ അതൃപ്​തി രേഖപ്പെടുത്തുകയും ചെയ്​തിരുന്നു. ഉമ്മൻ ചാണ്ടിയെ സജീവമാക്കണമെന്നാണ്​ മുന്നണി പ്രവർത്തകരുടെ ആവശ്യം.