പ്രഫുൽ പട്ടേൽ ലക്ഷദ്വീപ് ജനതയുടെ ജീവനും സ്വത്തിനും ഭീഷണിയുയർത്തുന്ന ബയോ വെപ്പൺ -കെ. സുധാകരൻ

തിരുവനന്തപുരം: ലക്ഷദ്വീപ് ജനതയുടെ ജീവനും സ്വത്തിനും ഭീഷണിയുയർത്തുന്ന ബയോ വെപ്പൺ തന്നെയാണ് അഡ്​മിനിസ്​ട്രേറ്റർ പ്രഫുൽ പട്ടേലെന്ന്​ കെ.പി.സി.സി പ്രസിഡൻറ്​ കെ. സുധാകരൻ. പ്രഫുൽ പ​ട്ടേൽ ജൈവായുധമാണെന്ന്​ വിശേഷിപ്പിച്ചതിന്​ രാജ്യദ്രോഹ കുറ്റം ചുമത്തിയ സംവിധായിക ഐഷ സുൽത്താനക്ക്​ സുധാകരൻ ഐക്യദാർഢ്യം അറിയിക്കുകയും ചെയ്​തു.

'അങ്ങേയറ്റം സമാധാനപൂർണമായ ജീവിതം നയിച്ചിരുന്ന ഒരു വിഭാഗത്തെ പിറന്ന മണ്ണിൽ അപരവൽക്കരിച്ച് ജനങ്ങൾക്കിടയിൽ അരക്ഷിതാവസ്ഥയുണ്ടാക്കി ആർ.എസ്​.എസ്​ അജണ്ടകൾ നടപ്പാക്കാൻ ശ്രമിക്കുകയാണ് കേന്ദ്ര സർക്കാർ. ഈ നടപടികൾക്കെതിരായ പോരാട്ടം ഇന്ത്യൻ നാഷനൽ കോൺഗ്രസ് മുന്നിൽനിന്ന് നയിക്കും.

സംവിധായികയും ആക്​ടിവിസ്റ്റുമായ ഐഷ സുൽത്താന ചാനൽ ചർച്ചക്കിടെ നടത്തിയ ഒരു പരാമർശത്തിൻെറ പേരിൽ രാജ്യദ്രോഹ കുറ്റം ചാർത്തി കേസെടുത്ത നടപടി എതിർ സ്വരമുയർത്തുന്നവരെ ഉന്മൂലനം ചെയ്യുക എന്ന ഫാഷിസ്​റ്റ്​ നയത്തിൻെറ ഭാഗമാണ്.

ലഘുലേഖകളും പുസ്​തകങ്ങളും കൈവശം വെച്ചതിന് പോലും യു.എ.പി.എ ചുമത്തുന്ന ഇടതുപക്ഷം, ലക്ഷദ്വീപിലെ ജനങ്ങൾക്ക് വേണ്ടി കേരളം ഒറ്റക്കെട്ടായി പാസാക്കിയ പ്രമേയത്തിൽ സംഘ്​പരിവാറിനെയും നരേന്ദ്ര മോദിയേയും പേരെടുത്ത് വിമർശിക്കാൻ തയാറാകാത്തതിൽ അത്ഭുതപ്പെടാനില്ല. ഇരക്കും വേട്ടക്കാരനും ഒപ്പം നിൽക്കുക എന്ന അവരുടെ നയം നടപ്പാക്കുകയാണ് ഇടതുപക്ഷം.

സമൂഹത്തോട് ഉത്തരവാദിത്തമുള്ള കലാകാരൻമാരെയാണ് ഈ ഫാസിഷ്​റ്റ്​ കാലഘട്ടത്തിൽ നാടിനാവശ്യം. സ്വന്തം ജനതക്ക് വേണ്ടി ശബ്​ദമുയർത്തിയ ഐഷ സുൽത്താനക്കും പൊരുതുന്ന ലക്ഷദ്വീപ് ജനതക്കും ഐക്യദാർഢ്യം' -കെ. സുധാകരൻ ഫേസ്​ബുക്കിൽ കുറിച്ചു.