ചികിത്സക്ക്​ ലക്ഷദ്വീപിൽനിന്ന്​ കൊച്ചിയിൽ എത്തിച്ച ഗർഭിണി മരിച്ചു

കൊച്ചി: വിദഗ്ധ ചികിത്സക്ക്​ ലക്ഷദ്വീപിൽനിന്ന്​ കൊച്ചിയിൽ എത്തിച്ച ഗർഭിണി മരിച്ചു. പ്രസവത്തിന് 10 ദിവസം മാത്രം ബാക്കിനിൽക്കെയാണ് മരണം. കുഞ്ഞിനെയും രക്ഷിക്കാൻ കഴിഞ്ഞില്ല. കിൽത്താൻ ദ്വീപ് മേലാചെറ്റ വീട്ടിൽ അഹമ്മദ് ഖാ​െൻറ ഭാര്യ എം.സി. ബീഫാത്തുമ്മാബിയാണ്​ (40) മരിച്ചത്.

ശ്വാസംമുട്ടലും ന്യുമോണിയയും ബാധിച്ച് ഈ മാസം രണ്ടിനാണ് ഇവരെ കവരത്തി ഇന്ദിര ഗാന്ധി ആശുപത്രിയിൽ പ്രവേശിപ്പിച്ചത്. വ്യാഴാഴ്ച രാവിലെ ശ്വാസംമുട്ടൽ വ‌ർധിച്ചു. ആരോഗ്യനില വഷളായതോടെ ഹെലികോപ്​ടറിൽ എറണാകുളം ജനറൽ ആശുപത്രിയിലേക്ക് മാറ്റുകയായിരുന്നു. എന്നിട്ടും ആരോഗ്യനില തൃപ്തികരമായിരുന്നില്ല. വെള്ളിയാഴ്ച രാത്രി എറണാകുളം ഗവ. മെഡിക്കൽ കോളജ്​ ആശുപത്രിയിലേക്ക് മാറ്റിയെങ്കിലും മരിച്ചു. കോവിഡ്​ നെഗറ്റിവായിരുന്നു.

കളമശ്ശേരി പാലക്കാമുകൾ ജുമാമസ്​ജിദ്​ ഖബർസ്ഥാനിൽ ഖബറടക്കി. മക്കൾ: വിദ്യാർഥികളായ ഷംസുൽ, ആരിഫ ബീഗം.