സ്​കൂൾ തുറക്കാൻ ഒരുക്കം തുടങ്ങി; മുഖ്യമന്ത്രി നിർദേശം നൽകിയെന്ന്​ വിദ്യാഭ്യാസമന്ത്രി

തിരുവനന്തപുരം: സംസ്ഥാനത്ത്​ സ്​കൂൾ തുറക്കാനുള്ള ഒരുക്കം തുടങ്ങിയെന്ന്​ വിദ്യാഭ്യാസ മന്ത്രി വി.ശിവൻകുട്ടി. മുഖ്യമന്ത്രിയുടെ നിർദേശപ്രകാരമാണ്​ ഒരുക്കങ്ങൾ നടക്കുന്നത്​. വിദഗ്​ധസമിതി​യുടെ നിർദേശം കൂടി ലഭിച്ച ശേഷം ഇക്കാര്യത്തിൽ അന്തിമ തീരുമാനമെടുക്കുമെന്നും വിദ്യാഭ്യാസ മന്ത്രി പറഞ്ഞു.

വിദ്യാഭ്യാസ-​തദ്ദേശ-ആരോഗ്യ വകുപ്പുകൾ ഉൾപ്പെട്ട വിദഗ്​ധസമിതിയാണ്​ സ്​കൂളുകൾ തുറക്കുന്നതിനെ സംബന്ധിച്ച്​ തീരുമാനമെടുക്കുക. മുഖ്യമന്ത്രിയാണ്​ ഈ സമിതിയുടെ അധ്യക്ഷൻ. തമിഴ്​നാട്ടിൽ സ്​കൂളുകൾ തുറന്നതിന്​ ശേഷം കോവിഡ്​ വ്യാപനം കൂടിയെന്ന്​ റിപ്പോർട്ടുകളുണ്ടെന്നും വി.ശിവൻകുട്ടി പറഞ്ഞു.

അതേസമയം, സംസ്ഥാനത്ത്​ ഒക്​ടോബർ നാല്​ മുതൽ കോളജുകൾ തുറക്കുകയാണ്​. അവസാന വർഷ വിദ്യാർഥികൾക്ക്​ മാത്രമാണ്​ ക്ലാസുണ്ടാവുക. ഇതിനുള്ള മാർഗനിർദേശം ഉന്നത വിദ്യാഭ്യാസ മന്ത്രി ആർ.ബിന്ദുവിന്‍റെ അധ്യക്ഷതയിൽ ചേർന്ന യോഗത്തിൽ തീരുമാനിച്ചിരുന്നു. ഒരു ഡോസ്​ വാക്​സിനെങ്കിലും എടുത്തവർക്കാണ്​ കോളജുകളിൽ പ്രവേശനം അനുവദിക്കുക. വിദ്യാർഥികൾ കോവിഡ്​ നിയന്ത്രണങ്ങൾ കർശനമായി പാലിക്കണമെന്നും മന്ത്രി നിർദേശിച്ചിരുന്നു.