താമരശ്ശേരി അപകടം: മൂന്ന് കുട്ടികളടക്കം മരണം ആറായി VIDEO

താമരശ്ശേരി: ദേശീയപാതയിൽ അടിവാരത്തിനടുത്ത് കമ്പിപ്പാലം വളവിൽ ജീപ്പും ബസും കാറും കൂട്ടിയിടിച്ചുണ്ടായ ആപകടത്തിൽ ജീപ്പ് യാത്രക്കാരായ കുടുംബത്തിലെ അഞ്ചു പേരടക്കം ആറു പേർ മരിച്ചു. മൂന്നു കുട്ടികളടക്കം 10 പേർക്ക് പരിക്കേറ്റ​ു. കുട്ടികളുടെ നിലഗുരുതരമാണ്​. ശനിയാഴ്ച ഉച്ചക്ക് രണ്ടരയോടെയാണ്  സംഭവം. 

കരുവൻപൊയിൽ വടക്കേക്കര അറു എന്ന അബ്​ദുറഹിമാൻ (65), ഭാര്യ സുബൈദ (55), ഇവരുടെ മകൻ ഷാജഹാ​​​െൻറയും  ഹസീനയുടെയും മകൻ മുഹമ്മദ് നിഷാൽ (എട്ട്), അബ്​ദു റഹ്​മാ​​​െൻറ മറ്റൊരു മകൾ സഫീറയുടെയും പടനിലം പൂതാടി മുഹമ്മദ് ഷഫീഖി​​​െൻറയും മകൾ ഹന ഫാത്തിമ (11), മറ്റൊരു മകൾ സഫീനയുടെയും വെണ്ണക്കോട് തടത്തുമ്മൽ മജീദി​​​െൻറയും മകൾ ജസ (ഒന്ന്​), ജീപ്പ് ഡ്രൈവർ വയനാട് വടുവൻചാൽ പുളിക്കൽ പ്രമോദ് (45) എന്നിവരാണ് മരിച്ചത്.

വയനാട്ടിലെ ബന്ധുവീട് സന്ദർശിച്ചശേഷം നാട്ടിലേക്കു ജീപ്പിൽ മടങ്ങുകയായിരുന്നു അബ്​ദുറഹിമാനും കുടുംബവു​ം. കോഴിക്കോടുനിന്ന് സുൽത്താൻ ബത്തേരിയിലേക്ക് പോവുകയായിരുന്ന ‘രാജഹംസം’ ബസും ജീപ്പും കൂട്ടിയിടിച്ചതോടെ പിന്നാലെ വന്ന കാറും അപകടത്തിൽപെടുകയായിരുന്നു. സംഭവം അറിഞ്ഞെത്തിയ  സമീപവാസികൾ ജീപ്പ് പൊളിച്ചാണ് യാത്രക്കാരെ പുറത്തെടുത്തത്. മരിച്ചവരെയും പരിക്കേറ്റവരെയും താമരശ്ശേരി  താലൂക്കാശുപത്രിയിലും പിന്നീട് മെഡിക്കൽ കോളജാശുപത്രിയിലും എത്തിക്കുകയായിരുന്നു. വടുവൻചാൽ കടച്ചിക്കുന്ന് പുളിമൂട്ടിൽ മുത്തു എന്ന ചിന്നപ്പ​​​െൻറയും പ്രഭയുടെയും മകനാണ്​ മരിച്ച പ്രമോദ് (33). ഭാര്യ: സനിത. മകൾ: ദേവനന്ദ. അപകടത്തിൽപെട്ട കുടുംബത്തി​​െൻറ വാഹനത്തിൽ നാലു വർഷമായി പ്രമോദ്​ ജോലിചെയ്തുവരുകയാണ്​.