പ്രമുഖ സാമൂഹ്യ പ്രവർത്തകൻ ഡോ. കെ.കെ. ഉസ്മാൻ നിര്യാതനായി

ആലുവ: മത- സാമൂഹ്യ- സാംസ്കാരിക - പരിസ്ഥിതി മേഖലയിലെ സജീവ സാന്നിധ്യവും പ്രമുഖ ആതുര സേവകനുമായ ആലുവ ബൈപാസ് കവല കോഡർ ലൈനിൽ കിഴക്കേവീട്ടിൽ ഡോ. കെ.കെ. ഉസ്മാൻ (84) നിര്യാതനായി. ഖബറടക്കം ചൊവ്വാഴ്ച വൈകീട്ട് നാലു മണിക്ക് ആലുവ ടൗൺ ജുമുഅ മസ്ജിദ് ഖബർസ്ഥാനിൽ.

സച്ചാർ കമ്മിറ്റിയുടെ പ്രവർത്തനങ്ങളിൽ പങ്കുവഹിച്ച മുസ് ലിം സംഘടനകളുടെ സംസ്ഥാന കൺവീനർ, ഫോറം ഫോർ ഫെയ്ത്ത് ആൻ്റ് ഫ്രട്ടേനിറ്റി ജനറൽ സെക്രട്ടറി, സോഷ്യൽ അഡ്വാൻസ്മെൻറ് ഫൗണ്ടേഷൻ ഓഫ് ഇന്ത്യ (സാഫി) സ്ഥാപക ട്രസ്റ്റി, കൗൺസിൽ ഫോർ കമ്യൂണിറ്റി കോഓപറേഷൻ (സി.സി.സി), മുസ്‍ലിം സൗഹൃദ വേദി പ്രഥമ സമിതി അംഗം, ആലുവ ഫ്രൈഡേ ക്ലബ്ബ്, പരിസ്ഥിതി സംരക്ഷണ സമിതി തുടങ്ങിയ സംഘടനകളുടെ ഭാരവാഹി തുടങ്ങിയ നിലകളിൽ പ്രവർത്തിച്ചിട്ടുണ്ട്.

പിതാവ്: പരേതനായ എടവനക്കാട് ഖാദർ ഹാജി. ഭാര്യ: പരേതയായ എറണാകുളം ആലിങ്കപറമ്പിൽ എ.എം. നസീം. മക്കൾ: നസ്നീൻ, യാസർ, ഇസ്മിറ. മരുമക്കൾ: അംജദ് സിദ്ദീഖ്, റീമ, ഡോ. മിഹാസ്.