തനിക്കറിയില്ലെന്ന്​ പറയുന്ന ഐ ഫോൺ ദിലീപ്​ എട്ടു മാസം ഉപയോഗിച്ചെന്ന്​ പ്രോസിക്യൂഷൻ

കൊച്ചി: താൻ ഉപയോഗിച്ചിട്ടില്ലെന്ന്​ നടൻ ദിലീപ്​ അവകാശപ്പെടുന്ന ഐ ഫോണിനെ വിടാതെ ഹൈകോടതിയിൽ പ്രോസിക്യൂഷൻ. അന്വേഷണ സംഘം പറയുന്ന ഒരു ഐ ഫോൺ ഏതാണെന്നറിയില്ലെന്നും അടുത്ത കാലത്തൊന്നും ഇത്​ ഉപയോഗിച്ചിരുന്നില്ലെന്നും ദിലീപ് ഹൈകോടതിയിൽ നൽകിയ വിശദീകരണം തെറ്റാണെന്ന്​ തെളിയിക്കുന്ന വിശദാംശങ്ങളാണ്​ പ്രോസിക്യൂഷൻ നിരത്തിയത്​. 2021 ജനുവരി 21 മുതൽ ആഗസ്റ്റ് 31വരെ 221 ദിവസം ഈ ഫോൺ ദിലീപ്​ ഉപയോഗിച്ചിരുന്നെന്നും ഇതിൽനിന്ന്​ 2075 കാളുകൾ ചെയ്തിട്ടുണ്ടെന്നും പ്രോസിക്യൂഷൻ കോടതിയെ അറിയിച്ചു.

എട്ടുമാസത്തോളം ഉപയോഗിച്ച ഫോൺ തനിക്കറിയില്ലെന്ന് ദിലീപിന് പറയാനാവില്ല. ദിലീപിന്റെ സഹോദരി ഭർത്താവ് സുരാജ് ഏഴു വർഷമായി ഉപയോഗിച്ചിരുന്ന ഫോൺ ആവശ്യപ്പെട്ടിരുന്നു. ഹാജരാക്കിയത് ഇതുതന്നെയാണോ എന്നുറപ്പിക്കാൻ കൂടുതൽ പരിശോധന ആവശ്യമാണ്​.

കോടതി ആവശ്യപ്പെട്ടതനുസരിച്ച് ഹാജരാക്കിയവയിൽ ദിലീപിന്റെ വിവോ ഫോൺ ഉണ്ടോയെന്ന് പ്രോസിക്യൂഷൻ കഴിഞ്ഞ ദിവസം സംശയം പ്രകടിപ്പിച്ചിരുന്നു. വിവോ ഫോണിൽനിന്ന് 12,000 കാളുകൾ ചെയ്തിട്ടുണ്ടെന്നും കഴിഞ്ഞ വർഷം ഡിസംബർവരെ ഇത്​ ഉപയോഗത്തിലുണ്ടായിരുന്നെന്നും കാൾ ഡേറ്റ രേഖകളുടെ അടിസ്ഥാനത്തിൽ വ്യക്തമാക്കി. വിവോ ഫോൺ ആവശ്യപ്പെട്ട് നൽകിയ നോട്ടീസിൽ ഐ.എം.ഇ.ഐ നമ്പറിലെ രണ്ട് അക്കം തെറ്റിപ്പോയിരുന്നു. പിഴവുതിരുത്തിയ പ്രോസിക്യൂഷൻ, ദിലീപ് ഈ ഫോൺ ഹാജരാക്കിയിട്ടുണ്ടെന്ന് ഉറപ്പുവരുത്തി.

അതേസമയം, വധഗൂഡ​ലോചനക്കേസുമായി ബന്ധപ്പെട്ട്​ ദിലീപ് ഉൾപ്പെടെ പ്രതികൾ നൽകിയ മുൻകൂർ ജാമ്യഹരജികൾ വ്യാഴാഴ്ച പരിഗണിക്കാൻ മാറ്റി. പ്രതികൾക്ക് കോടതി പ്രത്യേക പരിഗണന നൽകുന്നതായി ആക്ഷേപമുയർന്നിട്ടുണ്ടെന്ന്​ കോടതി വാക്കാൽ ചൂണ്ടിക്കാട്ടി. മുൻകൂർ ജാമ്യഹരജിയിൽ വാദം നീട്ടിക്കൊണ്ടുപോകാൻ കഴിയില്ല. പ്രതികൾക്ക് പ്രത്യേക പരിഗണന നൽകുന്ന സാഹചര്യം കീഴ്‌വഴക്കമാകാനിടയുണ്ടെന്നും ഇത്​ പ്രോത്സാഹിപ്പിക്കാനാവില്ലെന്നും കോടതി വ്യക്തമാക്കി.