മുഖ്യമന്ത്രിയുടെ പരിപാടിയിലേക്ക്​ പ്രതിഷേധ മാർച്ച്​; ലാത്തിച്ചാർജ്​, ദേശീയപാത ഉപരോധം

തേഞ്ഞിപ്പലം: സി.എം @ കാമ്പസ്​ പരിപാടിയുടെ ഭാഗമായി മുഖ്യമന്ത്രി വിദ്യാര്‍ഥികളുമായി സംവദിക്കുന്ന കാലിക്കറ്റ് സര്‍വകലാശാലയിലേക്ക്​ വിദ്യാർഥി യുവജന സംഘടനകളുടെ പ്രതിഷേധ മാര്‍ച്ച്​. യൂത്ത് കോണ്‍ഗ്രസ്, ഫ്രറ്റേണിറ്റി, കെ.എസ്.​യു, എം.എസ്.എഫ് പ്രവര്‍ത്തകരാണ് മാർച്ച്​ നടത്തിയത്​. ബാരിക്കേഡ്​ ഉപയോഗിച്ച്​ മാർച്ച്​ തടഞ്ഞ തടഞ്ഞ പൊലീസ്​ പ്രവർത്തകർക്കുനേരെ ലാത്തിച്ചാര്‍ജ് നടത്തി. നിരവധി​ പേർക്ക്​ പരിക്കേറ്റു.

ലാത്തിച്ചാർജിൽ പ്രതിഷേധിച്ച്​ തേഞ്ഞിപ്പലത്ത് പ്രതിപക്ഷ യുവജനസംഘടനകൾ ദേശീയപാത ഉപരോധിച്ചു. ഒരു മണിക്കൂറിലേറെ ദേശീയപാതയിൽ ഗതാഗതം സ്തംഭിച്ചു. ബന്ധുനിയമനം, പിൻവാതിൽ നിയമനം, ചോദ്യങ്ങൾക്ക്​ വിലക്കേർപ്പെടുത്തൽ തുടങ്ങിയ വിഷയങ്ങളിൽ പ്രതിഷേധിച്ചാണ്​ സംഘടനകൾ മാർച്ച്​ നടത്തിയത്​.

കേരളത്തിലെ പ്രധാന സർവകലാശാലകളിലെ വിദ്യാർത്ഥികളുമായി മുഖ്യമന്ത്രി നടത്തുന്ന സംവാദ പരിപാടിയുടെ സമാപനമാണ്​ കാലിക്കറ്റ് സർവകലാശാലയിൽ നടന്നത്​. എന്നാൽ, പരിപാടിയിൽ ചോദ്യങ്ങൾ ചോദിക്കുന്നതിന്​ വിലക്കേർപ്പെടുത്തിയതും കറുത്ത മാസ്​ക്​ അഴിപ്പിച്ചതും ചോദ്യം ചോദിച്ച വിദ്യാർഥിയോട്​ മുഖ്യമന്ത്രി ക്ഷുഭിതനായതും വിവാദമായിരുന്നു.