പ്രശ്​നങ്ങളുടെ മൂല കാരണം കെ.സി വേണുഗോപാൽ; 'കമ്മിറ്റ്​മെന്‍റ്​' ഉള്ളവരെ മാത്രമാണ്​ പട്ടികയിലുൾപ്പെടുത്തിയതെന്ന്​ പി.എസ്​ പ്രശാന്ത്​

തിരുവനന്തപുരം: പാർട്ടിയിൽനിന്ന്​ പുറത്താക്കിയതിനു​പിന്നാലെ എ.​െഎ.സി.സി ജനറൽ സെക്രട്ടറി കെ.സി. വേണുഗോപാലിനും നിയുക്ത തിരുവനന്തപുരം ഡി.സി.സി ​പ്രസിഡൻറ്​ പാലോട് രവിക്കുമെതിരെ ആഞ്ഞടിച്ചും കോൺഗ്രസിൽനിന്ന്​ രാജി​ പ്രഖ്യാപിച്ചും മുൻ കെ.പി.സി.സി സെ​ക്രട്ടറിയും നെടുമങ്ങാ​െട്ട​ യു.ഡി.എഫ്​ സ്ഥാനാർഥിയുമായ പി.എസ്.​ പ്രശാന്ത്​. കോൺഗ്രസിലെ സംഘടനാപ്രശ്​നങ്ങളുടെ മൂലകാരണം വേണുഗോപാലാ​െണന്നും വേണുഗോപാലുമായി നേരിട്ടോ അല്ലാതെയോ ബന്ധമുള്ളവര്‍ക്ക് മാത്രമാണ് ഡി.സി.സി പട്ടികയില്‍ സ്ഥാനം ലഭിച്ചിരിക്കുന്നതെന്നും വാർത്തസമ്മേളനത്തിൽ അദ്ദേഹം കുറ്റപ്പെടുത്തി.

പാലക്കാട്ട്​ എ.വി. ഗോപിനാഥിന് പുറത്തുപോകേണ്ടിവന്നതിനു കാരണവും ഇതാണ്​. അദ്ദേഹത്തിനുനല്‍കിയ വാക്ക് പാലിക്കാന്‍ കെ.പി.സി.സി പ്രസിഡൻറിനു​പോലും സാധിച്ചില്ല. രാഷ്​ട്രീയാഭയം കൊടുത്ത ആലപ്പുഴയിൽ പോലും സംഘടനയെ തകര്‍ക്കാനാണ്​ വേണുഗോപാൽ ശ്രമിച്ചത്​. പാർട്ടിയിൽ മൂന്നാമനായ വേണുഗോപാലിന് എല്ലാവരെയും ഒരുപോലെ കാണാനുള്ള മനസ്സില്ല. പുതിയ ഗ്രൂപ്പുണ്ടാക്കാനാണ്​ അദ്ദേഹത്തി​െൻറ ശ്രമം. താൻ പാർട്ടിക്കെതിരെ സംസാരിക്കുകയോ അച്ചടക്കം ലംഘിക്കുകയോ ചെയ്​തിട്ടില്ല.

തെരഞ്ഞെടുപ്പില്‍ തന്നെ തോല്‍പിക്കാന്‍ ശ്രമിച്ച പാലോട് രവിക്ക്​ ഡി.സി.സി അധ്യക്ഷസ്ഥാനം നൽകി കെ.പി.സി.സി തെറ്റായ സന്ദേശമാണ്​ നൽകുന്നത്​. തെരഞ്ഞെടുപ്പിനു​ശേഷം തന്നോട്​ സഹകരിച്ചവരെ പാലോട് രവി ഭീഷണിപ്പെടുത്തുകയും വ്യക്തിഹത്യ നടത്തുകയും ചെയ്തു. മാനസിക പീഡനം സഹിക്കാന്‍ കഴിയാതെയായതോടെയാണ് പ്രതികരിച്ചത്.

പാര്‍ട്ടിയില്‍ വിഭാഗീയത പ്രോത്സാഹിപ്പിക്കുന്ന, പച്ചക്ക്​ കള്ളം പറയുന്ന ആളാണ് പാലോട് രവി. പ്രവര്‍ത്തകരെ അദ്ദേഹം തമ്മില്‍ തല്ലിച്ചതിനാലാണ്​ നെടുമങ്ങാട് മണ്ഡലത്തിലെ പഞ്ചായത്തുകളിൽ ഭരണം കോണ്‍ഗ്രസിന്​ നഷ്​ടമായത്​. വെമ്പായം പഞ്ചായത്ത് എസ്.ഡി.പി.ഐയുടെ പിന്തുണയോടെ കോൺഗ്രസ്​ ഭരിക്കുന്നതിന്​ നേതൃത്വം കൊടുത്തതും അദ്ദേഹമാണ്​. അച്ചടക്കമില്ലാത്ത പാർട്ടിയായി കോൺഗ്രസ്​​ മാറി.

30 വര്‍ഷത്തെ കോണ്‍ഗ്രസ് ജീവിതം അവസാനിപ്പിക്കുകയാണ്​. ഏത് പാര്‍ട്ടിയുമായി സഹകരിക്കണമെന്ന് ആലോചിച്ചിട്ടില്ല. നേതൃത്വത്തില്‍നിന്ന്​ ആരും തനിക്ക്​ പിന്തുണയുമായി വരാത്തതില്‍ വേദനയുണ്ട്. മതേതരമൂല്യങ്ങള്‍ ഉയര്‍ത്തിപ്പിടിച്ച് രാഷ്​ട്രീയത്തില്‍ തുടരും. സി.പി.എമ്മുമായോ മറ്റു പാര്‍ട്ടികളുമായോ ചര്‍ച്ച നടത്തിയിട്ടില്ലെന്നും പ്രശാന്ത് പറഞ്ഞു.