പൊലീസ് കോൺസ്​റ്റബിള്‍ നിയമനം: അഡ്വൈസ് മെമ്മോ നല്‍കാൻ സാധ്യത പരിശോധിക്കും -മുഖ്യമന്ത്രി

തിരുവനന്തപുരം: കാസര്‍കോട്​ ജില്ല ആംഡ് പൊലീസ് ബറ്റാലിയന്‍ സിവില്‍ പൊലീസ് ഓഫിസര്‍ പരീക്ഷയിലെ വിവാദ റാങ്ക് ​പട്ടികയില്‍നിന്ന്​ പ്രൊവിഷനലായി അഡ്വൈസ് മെമ്മോ നല്‍കണമെന്ന ആവശ്യം പബ്ലിക് സര്‍വിസ് കമീഷ​െന അറിയിക്കുമെന് ന്​ മുഖ്യമന്ത്രി പിണറായി വിജയന്‍. െപാലീസുമായി ഒത്തുകളിച്ച്​ പി.എസ്.സി പരീക്ഷതട്ടിപ്പ്​ കേസ്​ പ്രതികൾ​ക്ക്​ ​ ജാമ്യം ലഭിച്ച വിഷയത്തിൽ പ്രതിപക്ഷം അടിയന്തരപ്രമേയത്തിന്​ അവതരണാനുമതി തേടി നൽകിയ നോട്ടീസിന്​ മറുപടി പറയുകയായിരുന്നു മുഖ്യമന്ത്രി. ക്രമക്കേട്​ നടത്താത്ത ഉദ്യോഗാർഥികളുടെ ആശങ്കക്ക്​ പരിഹാരം കാണണമെന്നാണ്​ സർക്കാറി​​െൻറ ആഗ്രഹം. ഭരണഘടനാസ്ഥാപനമായ പി.എസ്‌.സിയുടെ പരിധിയിലെ തെരഞ്ഞെടുപ്പ് പ്രക്രിയയില്‍ ഇടപെടാൻ സര്‍ക്കാറിന് പരിമിതിയുണ്ട്. എങ്കിലും കുറ്റക്കാരെ ഒഴിവാക്കി അഡ്വൈസ് മെമ്മോ നല്‍കണമെന്ന ആവശ്യം പി.എസ്.സിക്ക്​ മുന്നില്‍ അവതരിപ്പിക്കുമെന്ന്​ മുഖ്യമന്ത്രി പറഞ്ഞു. മറുപടിയിൽ തൃപ്​തരാവാതെ പ്രതിപക്ഷം ഇറങ്ങിപ്പോയി.

ഈ വര്‍ഷം ജൂലൈ ഒന്നിന് പ്രസിദ്ധീകരിച്ച റാങ്ക് പട്ടികയില്‍ ഒന്നും രണ്ടും 28ഉം റാങ്ക് നേടിയ ഉദ്യോഗാര്‍ഥികള്‍ പരീക്ഷയില്‍ ക്രമക്കേട് നടത്തി​യ സംഭവത്തിൽ അന്വേഷണം നടക്കുകയാണ്. ആധുനിക ഇലക്ട്രോണിക് ഉപകരണങ്ങള്‍ ഉപയോഗിച്ച് ക്രമക്കേട് നടത്തിയതായി കണ്ടെത്തിയിട്ടുണ്ട്. ഫോറൻസിക്​ റിപ്പോർട്ട്​ ലഭിക്കുന്നതിലെ കാലതാമസമാണ്​ അന്വേഷണത്തിന്​ തടസ്സമായത്​. കുറ്റപത്രം വൈകിയത്​ മാത്രമല്ല, കോടതിയുടെ ബോധ്യത്തി​​െൻറകൂടി അടിസ്ഥാനത്തിലാണ്​ പ്രതികൾക്ക്​ ജാമ്യം ലഭിച്ചത്​. നിലവിലെ ക്രൈംബ്രാഞ്ച്​ അന്വേഷണം കാര്യക്ഷമമായതിനാൽ കേസ്​ സി.ബി.​െഎ അന്വേഷിക്കേണ്ട കാര്യമില്ല. കുറ്റക്കാർക്ക്​ ശിക്ഷ ഉറപ്പാക്കുംവിധം മുന്നോട്ടുപോകും. പ്രതിയായ നസീം ജയിലില്‍ നിന്നിറങ്ങിയപ്പോള്‍ നടത്തിയ ഫേസ്ബുക്ക് പ്രതികരണം രാഷ്​ട്രീയപരിരക്ഷയുടെ പേരിൽ അല്ല. കുറ്റവാളികളെ കുറ്റവാളികളായി തന്നെയാണ് സർക്കാര്‍ കാണുന്നതെന്നും മുഖ്യമന്ത്രി അറിയിച്ചു.

പ്രതികൾക്ക്​ ജാമ്യം ലഭിച്ചത്​ പൊലീസ്​ അന്വേഷണത്തിലെ നിഷ്ക്രിയത്വത്തിന്​ തെളിവാണെന്ന്​ അടിയന്തരപ്രമേയത്തിന്​ നോട്ടീസ്​ നൽകിയ അനൂപ്​ ജേക്കബ്​ ആരോപിച്ചു. കഷ്​ടപ്പെട്ട്​ പഠിച്ച്​ പരീക്ഷയെഴുതുന്നവർ വഞ്ചിക്കപ്പെടുന്നുവെന്ന്​ സർക്കാർ തിരിച്ചറിയണം. ചോദ്യപേപ്പർ ചോർന്നില്ലെന്ന ക്രൈംബ്രാഞ്ച്​ എ.ഡി.ജി.പിയുടെ റിപ്പോർട്ട്​ കുറ്റക്കാരെ വെള്ളപൂശാനാണെന്നും അദ്ദേഹം കുറ്റപ്പെടുത്തി. ക്രൈംബ്രാഞ്ച്​ റിപ്പോർട്ട്​ അംഗീകരിക്കാനാവില്ലെന്ന്​ വ്യക്തമാക്കിയ പ്രതിപക്ഷനേതാവ്​ രമേശ്​ ചെന്നിത്തല, തട്ടിപ്പുകാർക്ക്​ സർക്കാർ കൂട്ടുനിൽക്കുകയാണെന്ന്​ ആരോപിച്ചു. പ്രതികളെ സംരക്ഷിക്കാൻ ആസൂത്രിതനീക്കമാണ് നടക്കുന്നത്. ഒത്തുകളിയിലൂടെ ജാമ്യം നേടിയ പ്രതികൾ പുറത്തിറങ്ങിയിട്ടും വെല്ലുവിളി നടത്തുകയാണെന്നും അദ്ദേഹം പറഞ്ഞു.